Laurdag inviterer Kvalheimsbygda store og små til aktivitetsdag i vakre omgjevnader.
– Det har nesten blitt ein tradisjon no på seinsommaren, seier Solveig Røsok Kvalheim i i arrangementskomiteen om aktivitetsdagen som i år blir arrangert for femte gong. Nytt av året er besøk av hundeklubben i Vågsøy.– Dei vil vise litt dressur, og ein kan også få klappe og stelle hundane, fortel Kvalheim.
Det vil også vere meir å klappe på for alle dyreelskarar. – På uteområdet ved grendahuset har vi mange dyr som ein kan sjå på og kose med, blant anna kaniner, kattungar, lam, geiter, høner og moskusender. Det blir også to timar med hesteriding ved Koven som ligg like ved grendahuset, seier Kvalheim.
I fjor kjøpte grendalaget inn ein mini-ATV, og den er på plass i år også. Ved Ongelsvatnet blir det kanopadling, og dei som vil kan gå tur opp Gamle Kvaheimsvegen med Barnas Turlag. På uteplassen ved grendahuset blir fleire forskjellige traktorar stilt ut, truleg også ein god, gammal gråtass. I tillegg kjem Vågsøy RC Lastebil med containervogna si fylt opp med sand, gravemaskiner og lastebilar.
Det blir også bogeskyting, køyretur med traktor, film frå Kvalheim inne i grendahuset, der det også er kafé med sal av blant anna «Kvalheimsgraut», heimelaga fiskeburgarar, kake, sveler og kaffi. Den populære snikkarbua skal også settast opp.