Over to dagar vil kreftpasientar og pårørande få informasjon om korleis ein handterer det praktiske etter ein har fått ein kreftdiagnose.
– Kurset er for alle, både dei som er før, under og etter behandling, og vil rettleie om korleis ein forheld seg til andre instansar når ein har fått kreft. Det kan vere eit uoversiktleg terreng i ein krevjande situasjon, og vi ønskjer at alle skal få mulegheit til same informasjon, seier Hilde Manseth Bjørhovde, lærings- og meistrings-koordinator ved Nordfjord sjukehus.
Kurset skal gå over to dagar, 12. og 19. november, og Bjørhovde håpar eit slikt kurs vil senke terskelen for kontakt.
– Ein kreftdiagnose er vanskeleg for både den som er sjuk og for dei pårørande. Vi har fått gode tilbakemeldingar på at tidlegare kurs gav nyttig informasjon om viktige tema.
På kurset vil ein få høyre frå kreftsjukepleiar i Vågsøy, Hilde Marriott, Pasientreiser, Psykiatrisenteret i Nordfjord, NAV, samt den nye kreftkoordinatoren i Nordfjord, Eli Bente Lote Henden.
Kurset er ope for alle så lenge ein har tilvising frå lege.
– Om ein lurer på noko i samband med dette, er det berre å ta kontakt, seier Bjørhovde.