I heimesnikra olabil laga av ein gamal sykkel vann June Adine Hjortland (11) olabilløpet i konkurranse med ni gutar.
– Det er pappa og eg som har laga olabilen av ein sykkel som eg hadde, sa June som var glad etter at det var klart at ho vann barneklassen.Venninnene Tiril og Christofa var heiagjeng og synest June var veldig modig som stilte opp.
God fart i bakken
Christian Gulhaugen i Svelgen Amcar Club leia olabilløpet i Tunnelbakken for andre gang.
– Det var mange bra konstruksjonar å sjå, seier han.
Men tunnelbakken er bratt med ein skarp sving, så løpsleiaren har som råd at nokre av olabilane må byggast litt om til neste år. Det vart eit par velt.
– Bilane må vere bygde for fart og ha brei sporvidde. Det er ein stor fordel med tynne hjul og store forhjul, seier Gulhaugen.
Set pris på moroa
Saman med sonen Filip og ein kompis var Anita Karlsen ein av dei mange som grilla pinnebrød rundt bålpanna til Barnas Turlag indre i Svelgen laurdag.
– Det er utruleg flott at nokon stiller opp og lagar dette til. Arrangementet er så fint, og det er så bra at det er tillaga noko for alle aldersgrupper. Dette set vi pris på, seier Karlsen.
Klatra på kasser
Også på bruskasseklatringa var det konkurranse, og Svenn Os seier at alle resultat vart notert. Han opna konkurransen med å klatre på 20 stabla bruskasser, men den som kom høgast greidde 26 kasser.
– Vi gjer ting på ein slik måte at alt er dugnadsarbeid, seier Thomas Øvstedal i komiteen for Nordgulen høgt og lågt.
Kvar enkelt organisasjon tar ansvar for sin aktivitet, og Øvstedal legg til at denne gangen var det fleire salsboder enn tidlegare.
– Vi har fleire boder og stands, og vi er veldig glade for at dei stiller opp, seier han.
For første gang var det mellom anna handarbeid og husflid å få kjøpt.
På Nordgulenslitet var det Langeneset Dream Team som var best.
– Vi får vandrepokalen etter å ha vunne tre år på rad. Vi er nok det laget som er best i form, seier Arne Rebni.