Namn: | Jørn-Arne Tomasgard |
Alder: | 45 år |
Sivilstand: | Gift med Kristine, to born |
Bustad: | Nordfjordeid |
Yrke: | Sjølvstendig næringsdrivande journalist |
- Kva er du mest oppteken av?
- Familie, jobb og fysisk aktivitet. Eg starta eige firma for vel eit år sidan og driv og bygger opp det. Det må skje i balanse med familielivet som er hektisk med to små born på to og fem år. Det er ein fordel å vere i god fysisk form for å finne den balansen. Fysisk velvere gjev psykisk velvere.
- Kva gjer du på fitida?
- Eg trenar så snart eg har ein sjanse til det. Går gjerne ein tur på Fossane eller trenar på Aktiv Trening. Likar å lese aviser, men problemet er å få sitje i fred med små ungar i huset. Det er alltid noko som må ordnast.
- Kven beundrar du?
- Eg beundrar alle som tek ein sjanse og klarer å skape noko. I distrikts-Norge er vi avhengig av at nokon har gode idear og vågar å setje dei ut i livet. Og folk som gjer ueigennyttige ting, til dømes gjev frå seg mykje pengar slik at andre skal få det betre. Fråtsing i rikdom har eg liten sans for.
- Kva er det beste med heimstaden din?
- Kort veg til alt, naturen som er storslagen, og nærleiken til familien.
- Kva står på di førsteside av Fjordenes Tidende?
- 100 nye statlege arbeidsplassar til Nordfjord. Staten reverserer sentraliseringa og satsar i distrikts-Norge.
- Kva ville du ha gjort om du var ordførar for ein dag?
- Ordna opp i trafikkforholda ved Nordfjordeid skule.
- Kva kulturoppleving hugsar du best?
- OL i Beijing 2008 der eg var som journalist for Bergens Tidende. Det var første gong vesten fekk eit skikkeleg blikk inn i det tidlegare stengde landet. Veldig minnerikt. Storslagent, men også trist med mykje fattigdom og undertrykking.
- Kva har du på nattbordet?
- Vennebyen og Karsten og Petra
- Kva nettstadar er du innom i løpet av ein dag?
- Eg må vel seie min eigen nettstad, BT.no, E24.no, DN.no, VG.no, dagbladet.no, fjordabladet.no, fjordingen.no, smp.no. og facebook.com. Ofte også fjt.no, men ikkje dagleg. Generelt er eg mykje på nett.
- Kva er meininga med livet?
- Å bruke evnene sine synes eg er ei meining med livet. Å få familie med born som ein kan forsøke å lære gode verdiar har gjeve livet mitt meining.