Namn: Ronny Silden Totland
Alder: 34 år
Adresse: Vågsvåg i Vågsøy kommune
Sivilstatus: gift og har to born
Yrke: dagleg leiar ved Nordfjordhallen
Hobby: dykking og korsong
Aktuell med: er dagleg leiar for Nordfjordhallen, som får besøk av plateaktuelle Comet Kid 27. februar. Bandet byr på både ein ungdomskonsert og ein konsert for dei over 18 år.
– Kvifor ønskte du Comet Kid til Nordfjordhallen?
– På bakgrunn av at bandet gjorde stor suksess på Malakoff i fjor, med fullsett område rundt storscena. Dette er ei gruppe som lager skikkeleg liv og røre, samtidig som dei verkeleg leverer musikalsk.
– Og det blir to konsertar med bandet på same dag?
– Eg ønskjer å halde ein ungdomskonsert på dagen, slik at yngre skal få eit musikktilbod. Nabokommunane jobbar for å få til eit busstilbod slik at ungdom kan få sikra seg billig tran-sport.
– Har du sjølv sett dei «live»?
– Nei, men kollegaer anbefalte dei.
– Korleis trur du kvelden kjem til å bli?
– Kvelden startar med Svelene frå Eid. Her får ein med seg kjende slagerar, før Comet Kid entrar scena med ei solid avslutning på ein flott heilaftan.
– Kva tykkjer du om Comet Kid si nyaste plate, Halley?
– Den er heilt konge! Eg er blitt heilt hekta på songane «When I'm Dead» og «Sail». Eg anbefaler alle å høyre plata deira.
– Korleis er interessa for konserten så langt?
– Ut ifrå tilbakemeldingane og Facebook, så trur eg det kjem ein del folk. Bandet kjem frå ungdoms-OL på Lillehammer og Rockefeller før dei kjem til oss.
– Kva anna har Nordfjordhallen på plakaten denne våren?
– Det blir mellom anna Ungdommens kulturmønstring for Vågsøy, jubileumsshowet til Måløy Musikklag, Øivind Blunck og Honningsvågrevyen denne våren.
– Korleis vil du beskrive den kommande våren?
– Musikalsk morosam!
– Kva ser du spesielt fram til frå vårprogrammet til Nordfjordhallen?
– Eg ser spesielt fram til å sjå deg som les dette i salen.