Namn: Ane Malene Søvik Nygård
Alder: 33 år
Bustad: Rasmusgarden i Saurdalen i Syvde
Sivilstand: sambuar og 2+1 barn
Yrke: rådgjevar i Vanylven kommune
– Kva planar har du for sommaren?
– Prøvar å halde tritt med behandlingsplanen til dottera mi på ni år som fekk påvist leukemi i mars. Kvardagen har vore prega av cellegift og biverknadar, samtidig som livet skal vere litt normalt og. Det positive er at det er lyst og fint. Sommarfilter er fint.
– Kva er ditt beste ferieminne?
– Ein tilfeldig sommardag heime, eller i feriehuset på Sandsøya, då vêret var slik som vi alltid har ei forventning av at sommaren skal vere.
– Kvar går draumeferien?
– Når ein bur på gard skjer det for mykje på denne tida til at ein bør bruke energi på å ønske seg andre stadar. Å finne ro og trivsel heime er viktig. Men når vi er ferdige med dette sjukdomsstyret har eg lova Gretha ei romsleg helg på Alexandra i Loen. Det er langt nok når ein har såpass mange reiser som vi har no.
– Blir du vêrsjuk om regnet høljar ned?
– Nei. Regn og grått vêr er ei fin anledning til å få ordna litt inne med godt samvit. Å klage over vêret er bortkasta energi.
– Kvar likar du best å bade?
– Badar ikkje, men kan finne på å vasse om høve byr seg. Men Sandviksanden på Hakallestranda er veldig fin! Luksus med nærleik til Hakalle Strandhus og Hakallegarden.
– Kva gjer du i hagen i sommar?
– Gjer eit tappert forsøk på å halde ymse vekstar i live. Med varierande hell.
– Kva fjelltopp er den finaste om sommaren?
– Er nok ikkje ein av dei som trakkar mest ivrig i fjellet. Men Bjørnen - rett ovanfor Saurdalen, med utsikt over nærmast heile kommunen, der er det fint.
– Kva er ditt beste festivalminne?
– Å vere med å arrangere Vanylvsråkk dei første åra var kjekt.
– Kva anbefalar du å lese på årets ferietur?
– Assorterte magasin. Lettlest underhaldning.
– Kven fortener ei korg jordbær?
– Helsevesenet, barneavdelingane i Ålesund og Trondheim. For omsorg, tålmod og tryggleik.