10. klassingar med sjølvskriven kabaret

Alle dei 22 elevane i 10. klasse ved Selje skule blir å sjå på scena når dei fredag og laurdag viser fram den sjølvlaga kabareten Viva la spøt.

Dei 22 avgangselevane ved Selje skule set fredag og laurdag opp den sjølvskrivne kabareten Viva la spøt. Alle elevane skal delta på scena, i tillegg til at dei står for lyd, lys, rekvisittar, kostyme, sminke og hår. Kabareten handlar om eit trekløver som er veldig interessert i strikking og spøt. Her er plakaten til arrangementet.  Foto: Privat

Kultur

– Det er elevane sjølv som har skrive manus og tildelt roller. Førestillinga handlar om eit trekløver som er veldig interessert i strikking og spøt. Dei har veldig lyst til å vinne eit spesielt spøt på eit lotteri og dei vinn førstepremien, men så viser det seg at dei har tatt lodd på feil bok, og endar opp med å vinne ein tur til Spania, fortel lærar Marilyn Osmundsvåg, som saman med lærar Arve Åhjem har hjelpt elevane.


– Nokre har sjølvsagt meir å gjere på scena enn andre, men elevane er også involverte i lys, lyd, kostyme, rekvisittar, sminke og hår. Elevane har også laga eit band som er det spanske hotellet sitt husband, forklarar Osmundsvåg.

Elevane har bestemt seg for å ha tre framsyningar. Premiere fredag og to førestillingar laurdag. Det blir også kafé der det er høve til å kjøpe rundstykke, kaffi og kake. Inntektene går til ein klassetur som elevane skal på til sommaren.