Vereide kyrkje var først ut fredag kveld, og laurdag ettermiddag blir det samling i Bremanger kyrkje.
– Repertoaret er henta frå salmeskatten til Eivind Skeie, han blir også til stades i begge kyrkjene, der han vil lose publikum gjennom programmet, og fortelje litt om salmetekstane sine undervegs, skriv Bremanger kammerkor i ei pressemelding.
Eyvind Skeie er kjend som salmediktar, prest og forfattar.
I 2007 gav Skeie ut si eiga salmebok med 316 salmar. I den nye norske salmeboka har han 55 eigne og omsette salmar. To av Skeie sine mest kjende tekstar er En stjerne skinner i natt og Tenn lys. Songar som har blitt folkeeige i landet vårt.
– Salmen er menneske si røyst, som svar på Guds tiltale og som uttrykk for menneskeleg truserfaring. På salmekvelden vil eg fortelje om nokre av salmetekstane mine, og så vil dei bli sunge av forsamling, kor og solistar, seier Skeie.