Kokken Tor står på scena i Kalvåg laurdag 2. august.
– Det blir ei pangavslutning på årets Kystfestival, seier Jan André Bolset i Aktiv Kalvåg.
Laurdag 2. august går Kokken Tor på scena i Kalvåg. Dette er eit av Noregs mest populære og etterspurte band til å presentere norsk rock på norsk, skriv arrangørane i ei pressemelding.
Kokken Tor er eit norskrock coverband. Med eit repertoar som består av det absolutt beste innan norske rockeslagerar, fangar dei publikum i si hole hand og tek dei med på ein hardtslåande hitkonsert med låtar frå Dum Dum Boys, deLillos, Jokke og Valentinerne, CC Cowboys, Ingenting og Postgirobygget med fleire.
Bandet består av musikarar med bakgrunn frå mange år på vegen i forskjellige band. I tillegg til eit energisk sceneshow er Kokken Tor kjend for å gje det dei har for at lokalet skal koke opptil fleire gongar før arrangøren kuttar straumen!
Bandet har dei siste åra jobba seg opp eit rykte for å vere det «galnaste» og «råaste» norskrock-partybandet som rullar langs norske vegar.
– Vi er superglade for at Kokken Tor sa ja til å vere med på årets utgåve av Kystfestivalen i Kalvåg. Ekstra stas er det at to av medlemmene er frå Bremanger, Kim Arin Schei og Thomas Lillerovde. I år går vi av med eit PANG, seier Bolset.
Det er Aktiv Kalvåg i samarbeid med Kalvåg Kystlag og Knutholmen som står bak Kalvåg Kystfestival, 1. – 3- august.