Selje Senterparti har sendt inn følgjande høyringsuttale til Nasjonal helse- og sjukehusplan. Uttalen stod på trykk 11. februar:
Selje Senterparti er sterkt uroa over innhaldet i den nye Helse- og sjukehusplana som no er ute på høyring.
Intensjonen i plana er sikkert god, men det må vere samsvar mellom teori og praksis. Vi viser til fleire gode intensjonar som mellom anna:
«Helsetjenesten skal tilby befolkningen helsehjelp av god kvalitet. Kjennetegn ved god kvalitet er at tjenestene er virkningsfulle, trygge og sikre, involverer brukerne, er samordnet og preget av kontinuitet, utnytter ressursene på en god måte og er tilgjengelige og rettferdig fordelt.
Trygge sykehus og bedre helsetjenester der folk bor.
– Vi vil ha trygge sykehus og bedre helsetjenester for alle i Norge, uansett hvor de bor. Vi skal ha mindre variasjon i kvaliteten, og beredskap som gir alle trygghet for at de får helsetjenestene de trenger når de trenger det. Med Nasjonal Helse- og sykehusplan gir vi både de små og de store sykehusene klarere roller og tydeligere ansvar i behandlingen av pasientene. Vi vil sørge for at de fleste får hjelp for det meste ved sitt lokale sykehus, også når det haster, sier Høie. Vi skal ha et godt og forutsigbart tilbud til akutt syke pasienter i hele landet.»
Som sjukehusplana viser til skal det både vere tilgjengeleg og rettferdig fordeling av helsetjenester i Norge. Selje Senterparti vil på det sterkaste sette spørsmålsteikn ved tilgjengelegheit i vår kommune. Dette ut ifrå både vêrforhold, geografi og ikkje minst kommunikasjon med dårlege vegar og nødvendige ferjeruter.
«Dei fleste skal få hjelp for det meste ved sitt lokalsjukehus, også når det hastar.» Slik Selje Senterparti tolkar denne utsegna må det då finnast eit akuttmottak på lokalsjukehuset.
Akuttkirurgien ved vårt lokalsjukehus, Nordfjord sjukehus, vart fjerna i 2012 og det næraste sjukehuset for folk i Nordfjord vart då Volda sjukehus. Det vart inngått ei avtale mellom Helse Vest og Helse Midt om at fødande i Nordfjord skulle nytte Volda Sjukehus til fødeavdeling. No har helseminister Høie funne ut at akuttkirurgien ved Volda Sjukehus skal også forsvinne. Det utgjer dermed ei fare for våre fødande kvinner som ikkje lenger vil kunne nytte Volda Sjukehus etter gjeldande avtale frå 2012.
Selje Senterparti vil be om at helseministeren let Volda Sjukehus sin akuttkirurgi vere i fred slik at kvinner frå Nordfjord framleis kan ha tryggleik i eit sjukehus som ein kan komme seg til UTAN å vere avhengig av ferje.
Selje Senterparti registrerer også at fyljande står i sjukehusplana:
«Akuttmedisinske tjenester utenfor sykehus. Norge har allerede svært gode akuttmedisinske tjenester utenfor sykehus. Ambulansetjenesten har en avgjørende rolle i akuttberedskapen, og regjeringen legger til rette for framleis styrking av denne tjenesten. Oppgavedeling mellom sykehus og ambulansetjenester må ses i sammenheng. Dersom det gjøres endringer i akuttberedskapen ved sykehus, må det samtidig vurderes om det er behov for å styrke bil-, båt- og luftambulansetjenesten for å sikre nødvendig kapasitet og kompetanse.»
Selje Senterparti er sterkt uroa over ein slik tankegang og haldning. Ambulansetenesta er viktig men ein må aldri lurast til å tru at ein ambulanse skal kunne erstatte eit fullverdig sjukehus.
Selje Senterparti ber helseministeren også å sjekke ut statistikken over auka transportfødslar i tidsrommet etter at akuttkirurgien og dermed fødeavdelinga ved Nordfjord Sjukehus vart nedlagt, frå 2012 og fram til i dag.
Statistikken viser eit urovekkande auka tal fødslar på veg til sjukehus. Dette er sett frå vår side, ikkje ei ønskjeleg utvikling, og om akutten forsvinn frå Volda Sjukehus vert det for desse kvinnene i Nordfjord enda lenger reise til sjukehus i Førde.
Selje Senterparti viser til gode intensjonar i helse og sjukehusplana og krev at helseministeren oppfyller desse ved å blant anna la akuttkirurgien i Volda bestå.
Gunn Sande
Senterpartiet i Selje