Opninga av det nye biblioteket i Vågsøy har blitt utsett i om lag ein månad. Komande måndag opnar forhåpentlegvis biblioteket dørene.
– Vi hadde eit håp om å sleppe til før, men vi har venta på å få alle papira i orden for å kunne nytte huset, fortel tenesteleiar for kultur i Vågsøy kommune, Odd Gunnar Myhre, som hadde sett føre seg opning etter påske.
Vil skape ein møteplass
Når opningsdagen kjem blir det ei markering med både kulturinnslag og besøk frå ordførar og ein forfatter.
– Det blir litt underhaldning med kulturelle innslag, vi har planlagt eit forfattarbesøk på dagtid og på opninga på ettermiddagen kjem ordføraren, seier Myhre, og legg til:
– På dagtid håpar vi å kunne invitere alle tredjeklassingane i kommunen til biblioteket.
Bibliotekar Tamara Sortland har tidlegare sagt at ho håpar det nye biblioteket kan bidra til auka leselyst i kommunen.