Dei er ikkje tilfreds med vurderingane

Ernst Husevåg og Rita Nyland merkar store forandringar i grunnen på eigedomane sine i Hola på Nordfjordeid. Dei fryktar at arbeid i grunnen, ei eventuell belastning frå propellar på cruisebåtar som virvlar opp masse, og ei stor mengd bussar som køyrer i området, kan forverre situasjonen. – Denne steinen stod heilt rett tidlegare, støypte murar sprekk og asfalten krøllar seg, seier Husevåg. Arkivfoto: Marianne S. Rotihaug

Bebuarane i Hola sør på Nordfjordeid, som Fjordenes Tidende tidlegare har omtalt, er ikkje tilfreds med kommentarar og vurderingane som kjem fram i Seawalk Nordfjord AS sin søknad om rammeløyve.

Rita Nyland, Ernst Husevåg og Rune Husevåg seier at dei fryktar for heimane sine om ein set i gong omfattande arbeid i området.

Fryktar for heimane sine

– Det finst ikkje dokumentasjon for gjeldande område. For oss som bur her er det ikkje godt nok at fagfolk «reknar med». Ein må vite, og ein må dokumentere, skriv bebuarane i eit skriv til plan- og utviklingssjef Kristine Dahl i Eid kommune, og held fram:

– Nye setningsskadar melder stadig sin framkomst, og målingar går føre seg i regi av Eid kommune.