Marine Harvest skal drifte den nye undervisingskonsesjonen for oppdrett av laks og aure som Sogn og Fjordane fylkeskommune har fått, og som blir knytt opp mot naturbruk- og akvakulturlinja ved Måløy vidaregåande skule.
– For Marine Harvest betyr det at vi både får vere med å utdanne nye driftsteknikarar, og at vi kan bidra til at ein har eit tilbod på skulen, seier Viktor Flister.
Oppdrettskonsesjon til Måløy vidaregåande skule
Nyleg tok Lovise Blålid Refvik og Daniel Steinagard, tverrfagleg eksamen i akvakultur etter vg2 ved Marine Harvest sine anlegg i høvesvis Juvika i Bremanger og Rundereim i Selje.
– Dette er viktig og framtidsretta, og lovar godt for ei positiv utvikling av oppdretts- næringa, basert på ungdommeleg engasjement og fagleg kunnskap, seier Flister.
Han viser til at dei ikkje berre treng driftsteknikarar ved anlegga.
– Vi har jo også bruk for folk som med høgare utdanning, og då er det ein fordel med praktisk bakgrunn, seier Flister.
Han er svært nøgd med engasjementet til YSK-elevane dei har hatt inne.
– Dei er veldig positive elevar. Dette er ungdom som både ser moglegheit i næringa og i tillegg tenker på vidareutdanning, fortel driftsleiaren.
Elevane som går Yrkes- og studiekompetanse (YSK), tidlegare TAF, vil etter fire års skulegang og praksis ende opp med både fagbrev og spesiell studiekompetanse med fordjuping i realfaga matematikk, fysikk og kjemi. Under utdanning kombinerer ein arbeid i bedrift med å gå på skule. I løpet av dei tre første åra går dei på skule tre dagar i veka og arbeider to dagar. Siste skuleåret har dei skule to dagar i veka og arbeid tre dagar i veka. Dei mottar lærlinglønn frå første arbeidsdag. Med denne bakgrunnen er elevane klare til for ei høgare utdanning ved høgskule eller universitet, i tillegg har dei eit fagbrev som kvalifiserer for yrkeslivet rett etter vidaregåande skule.