– Fysioterapeutane i kommunen har ventelister på fleire månader. Dette er synd, då det er ein fordel for pasientar å kome raskt til behandling, forklarer Øyen, som er privatpraktiserande fysioterapeut og har starta opp hos Kiropraktor Kvalheim i Måløy sentrum.
– I dag er det ingen andre fysioterapeutar som driv heilt privat her. Mange ønskjer å kome raskt til behandling og sidan eg ikkje har venteliste, håpar eg å kunne hjelpe folk på den måten, seier ho.
Frå januar 2017 blei det innført eit vedtak som medfører at alle må betale eigenandel for behandling hos fysioterapeut.
– Å kome i gang med behandling tidleg kan føre til raskare bedring som igjen kan medføre færre behandlingar. Derfor treng ikkje behandling hos ein privat fysioterapeut nødvendigvis å bli dyrare enn behandling hos fysioterapeut med kommunal avtale, fortel Øyen.
Avhengig av marknaden
Opphavleg er 27-åringen frå Nordfjordeid, men er no busett på Stårheim. Fysioterapeuten har tidlegare arbeidd på klinikk og sjukehus i Bergen og klinikkar i hovudstaden.
– Det å jobbe på klinikk er veldig spennande og givande. Det er ikkje så mange jobbmoglegheiter her i området, så løysinga er gjerne å starte privat. Eg har jobba privat både i Bergen og Oslo, men det kan ikkje samanliknast med Måløy, så eg er veldig spent på korleis marknaden er her, seier Øyen, og legg til:
– Akkurat no var det å starte opp privat det som var alternativet, så eg får berre hoppe i det med begge beina og ta sjansen.
Førebyggande behandling
Øyen tok fysioterapiutdanninga si i København og har i tillegg tatt ein master i idrettsfysioterapi ved Norges idrettshøgskole i Oslo. Masteren fullførte ho for berre nokre veker sidan.
– Dei dagane du føler deg som Supermann, skal du få lov til det
– Kva behandling ein nyttar kjem heilt an på kva problem den enkelte har. I nokre tilfelle kan det være aktuelt med benkebehandling, mens tilrettelagt trening kan være meir aktuelt i andre tilfelle. Behandlinga kan vere førebyggande så vel som rehabiliterande og kan gå føre seg individuelt eller i grupper, alt etter pasientens behov og ønskje, fortset ho.
Kvinnene dreg lasset
– Eg ser fram til å skape min eigen arbeidsplass her i Måløy. No står det berre att å sjå om eg får dette opp å gå, seier ho.