– Vi i Stadlandet idrettslag tenkte at det hadde vore litt kjekt om det skjedde noko på sommarstid på Stadlandet. Vi har jo så mykje å ta av, så det hadde vore fint å lage noko for heile familien, forklarar leiar i idrettslaget Margareth Leivdal.
Dette var utgangspunktet for at Sommaraktive Stadt vart ein realitet i fjor.
– Arrangementet har blitt noko positivt som vi som bur her, folk som kjem her ifrå og tilfeldige turistar, kan vere med på. Tanken når vi lagde Sommaraktive Stadt i fjor var å skape bulyst og få det til å skje noko, fortel Leivdal.
Har fått med bygda
Gler seg over at aktivitetsveka er i gang
– I fjor var det idrettslaget som stod for all aktiviteten. Det var litt travelt. I år heldt vi litt igjen, og fekk med oss fleire arrangørar. Skyttarlaget, båtlaget, ungdomslaget, bedrifts- foreininga og Filadelfia er alle med på arrangementet. Derfor kunne vi lage Sommaraktive Stadt i år også, og no trur eg vi har klart å skape ein fast tradisjon, seier Leivdal.
Årets utgåve av Sommaraktive Stadt vart starta for ei veke sidan, og blir avslutta med Korsadagen laurdag.
I løpet av den aktive veka har barn og vaksne kunne delteke på blant anna fotballturnering, volleyballturnering, aktivitetsdag i Korsen, guida fjelltur, surfing, yoga, skyting, paintball og ein eigen vassdag i hamna.
Vil ha noko for alle
Vassdagen, som Båtlaget arrangerte, var søndag, og trass i at vêret ikkje spelte heilt på lag, samla mykje folk seg i hamna for å delta på sjøaktivitetar.
Barn og vaksne kunne blant anna få prøve kajakk eller SUP-brett, køyre tube, sitte på med Eliasbåten, delta i palleløp eller ta årets første bad.
– Vi prøver å ha eit breitt spekter av aktivitetar, slik at vi skal ha noko for alle. Ikkje berre organiserte aktivitetar, slår Leivdal fast.
Ho er godt nøgd med oppmøte under årets arrangement.
– Det er vanskeleg å seie noko om kor mange som deltar, fordi folk kjem og går. Men på aktivitetsdagen i Korsen var vi om lag 200. Det har blitt til at folk legg opp ferien sin etter når Sommaraktive Stadt blir arrangert, seier leiaren.