Overskotet kjem, ifølge ei pressemelding, i hovudsak av høgare skatteinntekter og inntektsutjamning enn føresett, høgare tilskot til busetjing av flyktningar, høgare avkasting frå kapitalplassering og mindreforbruk innanfor oppvekst/kultur og sentraladministrasjon.

Innanfor helse og omsorg er det eit meirforbruk på 12,4 millionar kroner, i all hovudsak knytt til høgare vikarbruk og tenestekjøp enn budsjettert innanfor heimetenestene, psykiatri og vernepleietenesta. Det gjer at det samla for drift/tenesteyting er eit meirforbruk på cirka 7 millionar kroner. Avdrag på lån, renteinntekter og renteutgifter er om lag som budsjettert.

– Resultatet for 2017 syner kor viktig det er å halde oppe trykket på tiltak for å ha nødvendig handlingsrom i åra framover, slik det er lagt opp til i budsjettet for 2018, seier rådmann Åslaug Krogsæter i pressemeldinga.

– Det gjeld særleg innanfor helse- og omsorgstenestene. Her pågår det for tida eit omfattande arbeid med omstilling og ny organisering, og tett oppfølging gjennom året for å unngå tilsvarande overskridingar på vikarbruk og tenestekjøp i 2018 som i 2017, seier Krogsæter vidare.

– Det er positivt med eit lite overskot, men heilt nødvendig med ytterlegare tiltak for å få større handlingsrom i åra som kjem, og raskast råd kunne ta ut gevinstar ved kommunesamanslåinga som no står for døra. Eid er ein kommune i vekst. Det skaper utfordringar for drift og tenester på kort sikt, men veksten vi opplever er heilt nødvendig for å sikre utvikling og gode tenester på lang sikt, seier Bjørlo.