Den danske vikarlegen, som er tiltalt for uaktsamt drap etter dødsulukka på Bryggja påska 2013, svarte nei på spørsmål om han erkjende straffeskuld på alle punkta han er tiltalt for då rettssaka mot han starta i Fjordane Tingrett måndag.

Legen er tiltalt for brot på straffelova paragraf 239, som betyr uaktsamt bildrap med ei strafferamme på inntil seks år.

Han er òg tiltalt for brot på vegtrafikklova sin paragraf 31 for ikkje å ha vore aktsam, for å ha køyrd i rusa tilstand og for å ha brote fartsgrensa.

Føraren i den møtande bilen, ei 49 år gamal kvinne døydde. Ho var frå Polen, men hadde budd og arbeidd i Måløy i mange år.

I rettssaka, der den danske legen er på tiltalebenken, er to av borna til den avdøde kvinna til stades med sin bistandsadvokat Catharina Skage.

Aktor i saka er politiadvokat Erling Melvær. Dommar i Fjordane Tingrett er Gunnhild Grove.

Legen sine forsvarar er Paul Inge Angelshaug og Elisabeth Elliott.