Søvn og medisinar var sentrale tema i Fjordane tingrett i den første dagen av rettssaka etter dødsulukka på Bryggja i 2013.

Då den danske legen sette seg i bilen for å køyre den rundt fem mil lange turen heim til Måløy etter nattevakt på legevaktsentralen på Nordfjordeid hadde han sove berre tre timar sidan han gjekk på jobb onsdag morgon, over eit døgn før ulukka.

Det kom fram under forklaringa til den danske legen måndag.

Legen hadde først hatt ordinær vakt på legekontoret i Måløy dagen før ulukka. Om kvelden utan å ha sove reiste han til Nordfjordeid der han gjekk på nattevakta som starta klokka 21.00 om kvelden og som varte til neste dag klokka 09.00.

I retten forklarte legen at han på ei vanleg vakt på legekontoret har i snitt tre til fire pasientar i timen.

Natta før ulukka hadde han hatt seks pasientar. I retten sa han det var ei roleg nattevakt. I løpet av nattevakta så sa han at han hadde sove tre timar.

I løpet av natta hadde han også hatt migreneanfall og måtte ta smertestillande tablettar i løpet av natta.

Like fullt så hevda legen at han kjende seg utkvilt og i god form då han sette seg bak rattet for å køyre heim til Måløy. Han sa i retten at hadde han kjent seg trøytt eller uopplagt, så hadde han sove meir før han køyrde frå Nordfjordeid til Måløy.

Like før ulukka på Rv 15 på Bryggja hadde han stansa på bensinstasjonen og fylt diesel, og kjøpt seg ei brus.

Leiaren ved legevaktsentralen då legen jobba der, Elsa Aslaug Ommedal, skal vitne i rettssaka.

Det skal også kommunelegane i Vågsøy, Bengt Georen og Trond Inselseth.