Stadlandet har igjen fått sin eigen frisørsalong. Førre veke opna Karamia dørene.
Karen Marie Holtleite, innehavar av Karamia, har tidlegare jobba ved Frisørhuset vi2 i Selje sentrum.
Nyleg bestemte ho seg for å starte sjølv, sidan det ikkje har vore frisør på Stadlandet dei siste åra.
– Det er mange som spør om eg verkeleg tør å satse sjølv, men ein frisør er det alltid bruk for. Ein må prøve og så sjå korleis det går, seier 21-åringen.
Og det verkar som behovet er. Ei veke etter opning har den unge frisøren allereie hatt mange kundar innom.
Ho fortel at ho har blitt møtt med ein veldig varm velkomst, mange hyggelege kundar, og blomsterhelsingar.
– Det verkar som lokalbefolkninga på Stadlandet set pris på kortare veg til frisøren. Frisøren som opphavleg kjem frå Gildeskål i Nordland, er busett på Stadlandet, og er no godt etablert.
– Eg ser for meg ei lys framtid her på frisørsalongen. Eg gler meg i alle fall til å komme skikkeleg i gong, seier Holtleite.
Gunn Sande var ein av kundane som var innom for ein klipp då Fjordenes var til stades. Ho beundrar dei unge som vel å starte for seg sjølv i tøffe marknader.
– Eg blir imponert over dei unge som vel å kaste seg ut i marknaden. Eg beundrar dei rett og slett, seier Sande, som er svært glad for endeleg å ha ein eigen frisør på Stadlandet igjen.