Beredskapskoordinator Svein Barmen i Selje er innstilt på å legge til rette for landingsplass for helikopter ved Uniformpartner.
– Det er god løysing Uniformpartner tilbyr. Ein grei landingsplass og oppvarma garasje. Eg ser mange fordelar, seier Barmen.
Barmen meiner dei har eit klart behov for ein betre, og ikkje minst permanent, landingsplass i kommunen. Og han ser positivt på at 330-skvadronen i Florø no signaliserer at plassen ved Uniformpartner fungerer til deira formål.
– Vi har brukt idrettsbana til no. Men landing der gir skade både på bane og helikopter når granulat frå kunstgraset fyk opp i luftfiltra på helikopteret og helikopteret hiv opp duken på bana.
– Vil det vere kostnader involvert for kommunen?
– Ja, det vil nok koste noko utan at eg har rekna på beløp enno. Men ikkje så mykje. Det handlar om å fjerne nokre stolpar og grave ned ein kabal i samband med eit luftspenn ved Uniformpartner. Folka frå 330-skvadronen meinte det var litt for nært om dei måtte lande mot vinden, seier Barmen som antydar spleiselag for å hente inn pengane.
– Ja, eg vil gjerne utfordre andre delar av næringslivet i kommunen til å bidra. Dette er viktig for alle, seier Barmen.
330-skvadronen såg også på ein alternativ landingsplass til førstevalet i Selje. Den blir på marka nedanfor Seljetunet.