I samband med at Opplev Bremanger arrangerer Rock Weekend 9.–12. juli, har Bremanger Kystturisme og Opplev Bremanger inngått ei avtale om skjenking av alkohol og sal av mat under arrangementet.

Rock Weekend har sin base på og rundt Havly Pensjonat på Iglandsvik. Då delar av arrangementet skal gå på utsida av Havly på eit jorde like bak, så søkjer dei no Bremanger kommune om å få nytte skjenkeløyvet sitt på dette området.

Dette gjeld då for fredagen og laurdagen. Dei søkjer også om utvida skjenketid for torsdagen.

All skjenketid vil dei ha til klokka to om natta. Dei påpeikar at Bremanger Kystturisme As vil saman med Opplev Bremanger sørge for naudsynt vakthald og at sal av alkohol vil gå etter føreskriftene.

Dagleg leiar Magne Elde påpeikar at dette er avgjerande for konseptet og eit viktig bidrag for å skaffe Havly viktige inntekter til å kunne halde aktivitet heile året.