6. november skal «Årets Gründer 2015» kårast i Sogn og Fjordane. Vinnaren får 100.000 kroner.

Dette er fjerde gong prisen vert delt ut, og den heldige vinnaren får med seg penger som startkapital til nyskapinga si.

Utdelinga er eit samarbeid mellom Sparebanken Sogn og Fjordane, Innovasjon Norge, Framtidsfylket og Sparebankstiftinga Sogn og Fjordane.

- Målet med prisen er å stimulere til innovasjon i Sogn og Fjordane, og samtidig gje dei som allereie er innovatørar ei viktig merksemd, seier Pål Fidjestøl, kultursjef i Sparebankstiftinga Sogn og Fjordane.

Frist for å sende inn forslag til kandidatar er tirsdag 21. september.

Etter søknadsfristen vert det plukka ut om lag fem finalistar, som alle vert presentert på framtidsfylket.no den 14. oktober. Publikum vert deretter invitert til å stemme fram sin favoritt, fram til vinnaren vert kåra på Temposeminaret i Florø 6. november.

Juryen vil mellom anna bestå av Halvor Flatland, direktør Innovasjon Norge Sogn og Fjordane, Arvid Andenæs, adm. direktør Sparebanken Sogn og Fjordane og Gro Rukan, dagleg leiar av Framtidsfylket.