Eid-ordførar Alfred Bjørlo (41) er vald inn som medlem i det nye sentralstyret i Venstre.
Valet fann stad på Venstre sitt landsmøte på laurdag. Landsmøtet fornya også tilliten til leiartrioen Trine Skei Grande, Ola Elvestuen og Terje Breivik. I tillegg til Bjørlo får trioen med seg Guri Melby (Oslo), Arne Ivar Mikalsen(Nordland) og Rebekka Borsch (Buskerud) i sentralstyret.
Alfred Bjørlo har tidlegare vore politisk rådgjevar i Nærings- og handelsdepartementet og Samferdsledepartementet. Bjørlo vart i 2009 ordførar i Eid og vald inn på fylkestinget for Venstre.
Fylkesleiar Gunhild Berge Stang og stortingsrepresentant Sveinung Rotevatn møter også fast i Venstre sitt landsstyre. Laurdag vart også Peder Lofnes Hauge frå Gloppen direktevald vara her.