Den nye butikken «Ymse og litt av kvart» på Leikanger håper at det kjem mange innom på Korsadagen.
– Ja, vi ventar at det kanskje kjem ein del folk, seier Mats-Ole Skårbø Sande (18), som har sommarjobb på den nye butikken på Stadlandet.
Det skal vere underhaldning frå paviljongen, sal av mat og lykkehjul. Det kan nok gjere det litt livleg framfor butikken på ein fin sommardag.
I alle fall er butikken full av ymse og litt av kvart.
Når Gunn Sande presenterer varene i butikken får ein oppleve ei krambu med alt frå sjokolade i spissposar og eit utval varer frå Felleskjøpet til motorolje og Angry Birds-termosar.
– Kanskje er vi dei einaste på Leikanger som har livvestar, seier ho.
Mats-Ole kan vise fram kystgeitskinn frå deira eigen gard, medan mora Gunn har signert fleire av suvenirane og sjølv rosemålt fleire ting. Men også andre lokale kunsthandverkarar er representerte.
Butikken har ein sofa til å sette seg ned på og i utstillingsvindauga står det gamle ting heilt tilbake frå 1831. Mellom anna kan ein sjå ei petromax lykt.