Dette lesarinnlegget er skrive av elevane i 6. klasse ved Selje skule

Heime er for fritid, skule er for skulearbeid

Kvifor har vi lekser?

Er det nødvendig med lekser for å lære?

Vi i 6. klasse på Selje skule meiner at skule er for skulearbeid og heimen er for fritid.

Heime får ein gjerne ikkje hjelp til leksene, og mange har det bråkete. Då er det vanskeleg å finne ein roleg og stille plass. Derfor meiner vi at å få 30 minuttar lenger skuledag til å gjere skulearbeidet vil vere det beste.

Når ein kjem heim, er det siste vi tenkjer på lekser. I staden tenkjer vi på idrett, venner, middag, husarbeid osv.

Det at vi ikkje har heilt fri, gjer at vi blir stressa av å skulle rekke alt.

Nokre elevar er ferdig med lekser på eit kvarter, medan andre bruker to timar på lekser og somme har til og med begynt å grine fordi dei er så oppgitt og lei seg.

Vi meiner at slik skal det ikkje vere!

Vi foreslår 30 minuttar lenger skule og at «leksene» blir gjort på skulen og ikkje på det som skal vere fritida vår.

Vi skjønner at det er nødvendig å øve på skulearbeid, men det er ikkje nødvendig å øve heime.

Kvifor ikkje heller gjere øvinga på skulen?

Elevane har både tatt illustrasjonsbilde til innlegget og ein elev har teikna ein illustrasjon. Foto: Privat