Betre forvaltning av bygg og eigedom

Venstre fekk fleire gjennomslag i kommunebudsjettet for 2023. Eitt av dei er ei sak vi har engasjert oss for i mange år: Å opprette eit kommunalt føretak som skal styre bygg og eigedom i kommunen.

Kinn kommune er ein stor aktør i bygg og eigedom. Kommunen eig skular, barnehagar, sjukeheimar, utleigebustadar, omsorgsbustadar, næringseigedom, grøntareal og anna. I dag er det alt vesentlege av dette lagt til administrasjonen, der politikarane i beste fall blir involvert i ettertid av at eigedom er kjøpt eller seld. Slik kan det ikkje vere.

Eit kommunalt føretak (Kinn bustad og eigedom KF) med eige styre og dagleg leiar vil slik vi ser det ha mange fordelar. Det vil:

  • Gje auka merksemd på energi- og klimareduserande tiltak i bygg, med krav til dokumentasjon og måloppnåing av igangsette tiltak

  • Gjere det langt lettare å rette opp i manglande vedlikehald.

  • Sikre langt raskare framdrift i eigedomssaker slik at kommunen kan kjøpe og selje eigedom på ein måte som bidreg til utvikling og verdiskaping.

  • Skape ein større heilskap i forvaltninga av bygg og eigedom, her under ei meir målretta satsing og tilpassing til (framtidige) klima og miljøkrav.

Eit kommunalt føretak vil kunne ha mange oppgåver, og ein kan tenke seg ei framtidig utviding/innskrenking av oppgåvene alt etter kva behov kommunen har. Vi har merka oss at særleg i Eikefjord og i Måløy har det vore eit ønskje om å få kommunen meir aktivt med på å realisere bustadtomter i samarbeid med private aktørar.

Ei slik satsing bør naturleg og effektivt skje via eit slikt kommunalt føretak.

Styret kan og bør samansettast av både personar med politisk kompetanse, og av personar med forståing for forvaltning av bygg og eigedom og dermed korleis kommunen kan gjere ein betre jobb med bygg og eigedomsforvaltning.

Slik får ein fleire kloke hovud med, og nokre blikk utanfrå, på eit område som i dag i realiteten er gøymd heilt vekk i den kommunale forvaltninga. Vi er heilt overtydd om at dette er god kommuneøkonomi.