Påska er ei tid med både tradisjonar og forventningar. Kvar enkelt av oss har si oppfatning av kva som er ei god påske. Nokon reiser til fjells, og andre reiser til havs. Andre tykkjer det beste med påska er at det er ei langhelg der ein berre kan slappe av. Ikkje alle har noko forhold til påskehelga eller feirar påske. Vi har ulike forventingar og tradisjonar knytt til påska.

Uansett kva forhold ein har til påska, håpar vi at lesarane våre set pris på det som har blitt ein påsketradisjon for Fjordenes Tidende. Vi har lyst til vere eit godt selskap for lesarane våre gjennom påskedagane, og lagar då ei ekstra fyldig og variert påskeavis.

I år har vi sett saman ei påskeavis med lokale nyheiter, møter med spennande menneske, reportasjar, påskekryss, eigedomssaker, debatt, sport og mykje meir. Alt dette fordelt på 60 sider i påskeavisa som kjem ut tysdag før påske. Første avis etter påske kjem ut onsdag 12. april. Fjt.no tek ikkje påskeferie. Det betyr at vi vil vere med deg gjennom heile påska, og gje deg jamleg oppdateringar på fjt.no.

I påska, i helger og andre periodar når mange har fri frå jobb og skule, er det alltid nokon som er på jobb slik at andre kan ha ei god fritid. Det er mange yrkesgrupper og frivillige som stiller opp slik at samfunnet kan gå rundt sjølv om mange har fri.

Når vi ferdast på fjellet eller på sjøen, er det nokon som står i beredskap for oss om uhellet er ute. Det er trygt og godt å vite at uansett kvar ein er, er der nokon som vil gjere alt dei kan for hjelpe oss. Ei oppmoding til oss alle er å ikkje utsette oss sjølve eller andre for unødig fare, slik at dei som står i beredskap ikkje brukar seg opp. Fjellvettreglane og sjøvettreglane er til for å følgast.

Vi i Fjordenes Tidende ønsker alle ei god og trygg påske!