Endeleg kjem skipstunnelen seier folk. Endeleg, etter alle desse utgreiingane som har gått føre seg i 150 år. Men kva med oss med tilknyting til Kjøde? Er det nokon som tenker på oss i det heile tatt?

Heilt sidan 80-talet har vi som har budd i Kjøde hatt dette hengande over oss, at kanskje ein dag kjem tunnelen som vil endre den kjære bygda vår for all framtid. No er ein kommen lenger i planlegginga enn nokon gong før, og det ser ut til at tunnelen faktisk kan komme. Dei som har hus på feil plass i bygda har fått beskjed om å flytte, og enkelte er allereie vekk. Etter oppstart kan vi forvente oss ei anleggsperiode på minst 5 år. Ingen veit sikkert kor lang tid det faktisk kjem til å ta då ingen har bygd ein skipstunnel før. Igjen må innbyggarane leve liva sine i uvisse om kva framtida bringar. Kan dei fortsette å bu der, eller må ein flytte? Om ein blir der i anleggsperioden vil ein måtte tole støy og støv om lag heile døgnet året rundt. Om ein må flytte, kva er det å flytte tilbake til? Ein ting er i alle fall sikkert; ein har fått ei bygd som for all framtid er delt i to av eit gigantisk hol i fjellet.

Når tunnelen ein dag står ferdig og innbyggarane i Kjøde har vore gjennom ei anleggsperiode på minst eit halvt tiår, er det naturleg å tenke at dei har fått gjennomgå nok. Men for Stad kommune er det ikkje nok. I staden startar ein opp ei ny periode med opparbeiding av næringsområde med ny runde med støy og støv. Ein ny stor grøn bit av bygda vert ofra for å lage det om til ein grå industriplass. Planane er store, og ikkje minst overraskande konkrete på dette stadiet. Medan grunneigarane knapt nok fått noko som helst informasjon om kva som er planlagt, har denne aktøren allereie kommen langt i planlegginga. Dette er ganske respektlaust all den tid området framleis er på private hender.

Ein trur at denne tunnelen skal bli ein kjempestor turistattraksjon, og det kan godt hende det kan bli. Men då må det leggast til rette for å nå nettopp dette målet. Eit digert industriområde med ei massiv kai i heile strandsona er ikkje noko ein tek bilete av og legg på Instagram. Om ein skal satse på turisme, må industriområdet leggast ein annan plass og la det vesle urørte som er igjen av Kjøde vere nettopp det, urørt. Det er dette turistane kjem for å sjå og oppleve; norske fjordar med vakker natur.

Når det i tillegg fleire gongar er blitt peika på kor dårleg utnytting av massane det er å dumpe dei i myra og i skråninga ned mot havets botn, så er det vanskeleg å forstå kvifor ein tviheld på desse planane. Kva er grunngjevinga til Stad kommune for å sløse vekk denne verdifulle steinen her i staden for å lage eit mange gongar større område lenger ute i fjorden? Ein vil vel ha størst mogleg næringsområde slik at ein er rusta for framtida? Og kva med miljøaspektet ved å grave opp ei stor myr som held på enorme mengder CO2? Har kommunen ingen betenkelegheiter med dette?

Det finnast mange lokasjonar som egnar seg mykje betre til industriområde og som gir ei heilt anna utnyttingsgrad av tunnelmassane. Kjøde får gjennomgå nok med sjølve tunnelen. Spar innbyggarane for inngrep som strengt tatt ikkje er nødvendige, og legg næringsområdet på ein betre egna plass!