Ambulansebil klar til utrykking – eller?
Nokre tankar og opplevingar om det å komme seg frå Ytre Bremanger til Førde sentralsjukehus.
16. desember vart det slik at mannen min måtte sendast til Førde sentralsjukehus. Etter Helse Førde si avgjerd for eitt år sidan skjer dette no over Frøysjøen med ny ambulansebåt til Florø og så vidare med ambulansebil til Førde. Første etappe av denne reisa er med ambulansebil på Bremangerlandet.
Spørsmålet til oss denne dagen var om vi kunne komme oss til Kalvåg med privatbil. Båten skulle komme til kai der. Det var mogleg for oss å ordne, men ikkje alle har denne moglegheita.
Ved framkomst til kaia i Kalvåg møtte det oss eit syn som skremde oss. Der stod ambulansebilen nedsnøa og iskledd. Var det meininga at dei som bemannar båten skulle gjere den klar til utrykking?
Ei responstid som allereie er uakseptabel hadde vorte vesentleg lengre om vi skulle venta heime på denne ambulansebilen.
Då folket i Ytre Bremanger kjempa for å behalde ambulansebilen, var det blant anna slike situasjonar vi frykta. Vi etterlyste også ved fleire høve kven som til ei kvar tid skulle syte for ambulansebilen som vart plassert i Ytre Bremanger var klar til bruk. Svaret vi fekk var at dette ville ordne seg.
Det synet som møtte oss 16. desember gav oss svaret vi har frykta: Ingen ser ut til å ha teke det ansvaret på alvor. Det skaper uro for liv og helse blant folket i desse bygdene, ei uro for at transport av sjuke folk tek for lang tid når ikkje alt er klart.
Eg skriv dette som privatperson, men eg er også leiar i Bremanger pensjonistlag med 120 medlemmar. Difor er eg kjend med at mange eldre fryktar denne lange reisa med bil, båt og så bil igjen.
Éin ting er sikkert: Skal ein om vinteren vente på klargjering av ein nedsnøa/nedisa ambulansebil kan det bli lange minutt å vente på hjelp.
Eg spør: Er det ikkje på tide at nokon tek ansvaret for å få denne ambulansebilen under tak slik at vi slepp slike situasjonar?
Det må leggast til at resten av transporten gjekk greitt, men synet av den nedisa ambulansen sit framleis fast i tankane.