Svar til dei vantruande Ap-politikarane

At SV skrotar Stad skipstunnel er direkte feil. Vestland SV, Stad SV, Kinn SV og Bremanger SV vil med dette melde at vi støttar Stad skipstunnel og vil jobbe opp mot eige parti for at dette prosjektet ikkje vert sett på vent eitt år. Dei viktigaste grunnane til dette er:

1. Prosjektet Stad skipstunnel er allereie starta opp. Alt førebuande arbeid er gjennomført. Eigedomar er kjøpt ut, innbyggjarane gjer seg klare for å flytte og byggjer hus andre stadar. Både kommunane og næringsdrivande har lagt ned svært store beløp gjennom regulering og vidare utvikling av område for mottak av massar, etter oppmoding frå Kystverket. Planar som skal vere ferdig når anbodet no snart går ut. Store investorar ser no til Stad for lokalisering og investering i framtidas grøne næringar, og står klare for investering. Uvissa som no atter ein gong blir skapt rundt realisering av Stad skipstunnel er svært utmattande for innbyggjarane og vil vere direkte skadeleg for næringsutviklinga i regionen.

2.Stad skipstunnel er eit grønt, framtidsretta prosjekt. Det vil bidra til å vri gods- og persontrafikk frå land til sjø (Pelagia i Moldefjorden vil bruke massar til ny hamn, og flytte 60 lastebillass per dag over til sjø), ingen andre prosjekt kan vise til større gjenbruk av massar.

3. Stad skipstunnel blir eit internasjonalt reiselivsikon. Vil setje Noreg som grøn og nyskapande havnasjon på kartet. At området er underutvikla innan reiseliv gir oss ein unik moglegheit til å byggje opp kysten som eit berekraftig reisemål i tråd med nasjonal reiselivsstrategi og vere eit utstillingsvindauge internasjonalt.

Vi må seie at det var med vantru vi las framlegget til statsbudsjett frå Ap og Sp-regjeringa. Dei hadde ikkje med ny veg og toglinjer mellom Voss og Arna. Eit prosjekt som er svært viktig for innbyggjarane og næringsliv mellom Bergen og Voss. Eit heilt avgjerande rassikringsprosjekt i Vestland som verken Ap eller Sp har løfta inn i statsbudsjettet. Vi forventar at Ap jobbar opp mot si eiga regjering for å løfte fellesprosjektet Voss-Arna inn i statsbudsjettet.