Fjordenes Tidende vart saman med Firdaposten invitert til å delta på kommunesamlinga til Kinn kommune, som vart arrangert på Raudeberg. Begge redaktørane i dei to lokalavisene stilte sjølvsagt opp, og vi deltok på både gruppearbeid og i paneldebatt.

Det var kommunedirektør og ordførar som inviterte til kommunesamlinga. I invitasjonen som gjekk ut til kommunestyret, leiarar i Kinn kommune og ulike aktørar i lokalsamfunnet stod det: Korleis skape ein tilpassingsdyktig og innovativ kommune som kan handtere våre samfunnsutfordringar og samskape med lokalsamfunnet?

Under gruppearbeidet kom det eit spørsmål frå ein lokalpolitikar: – Når lokalavisa deltek på denne måten, er ikkje det å blande rollene?

Det er eit heilt naturleg og forståeleg spørsmål.

I eit lokalsamfunn har vi alle ulike roller. Enkeltpersonar har som oftast fleire roller i eit lokalsamfunn. Ein person kan vere både innbyggar, foreldre, politikar, nabo, trenar, huseigar, næringsaktør, FAU-leiar og leiar i grendelaget. Sjølvsagt kan ein då kome opp i rollekonfliktar, og det gjeld då vere ryddig med kva hatt ein har på seg.

Fjordenes Tidende er ein viktig samfunnsaktør i lokalsamfunnet, og vi har også fleire roller. Fjordenes Tidende er ei bedrift, eit mediehus og arbeidsgjevar plassert i Kinn kommune, med tilsette i både marknadsavdeling og redaksjon.

Fjordenes Tidende er også eit redaktørstyrt medium med eit samfunnsoppdrag. Til liks med andre redaktørstyrte medium, rettar vi oss etter Redaktørplakaten og Ver Varsam-plakaten, og har med det eit tydeleg skilje mellom dei ulike rollene våre.

Det er mange aktørar i lokalsamfunnet. Vi kan alle bidra til samskapinga, men på ulike måtar og i kvar våre roller.

Kommunesamlinga er eit godt initiativ, men er det rett bruk av offentlege midlar? Korleis blir framdrifta, og kva får innbyggarane igjen? Det skal lokalavisa følge opp.