Vi må byggje eit sterkt fellesskap i Stad kommune
I år er det kommuneval og eg har blitt vald som ordførarkandidat for Senterpartiet i Stad kommune. Det synest eg er ei fantastisk fin utfordring å få. Spesielt kjekt er det at så mange har sagt ja til å stå på lista. Her er det mange som har erfaring frå politikk, arbeidsliv, næringsliv, friviljug arbeid, idrett og musikkliv. Felles for alle på lista er at vi på same måten som alle innbyggarane i Stad, har levd liv som gjev oss ulik bakgrunn og erfaringar, som vi vil ta med oss i arbeidet for å gjere Stad kommune til ein god stad å bu.
Det å bu ein stad og høyre til eit lokalsamfunn gjev oss identitet og fellesskap, og er ikkje det noko av det viktigaste for oss, det å høyre til? Å vere ein del av eit fellesskap gjev både tryggleik for den einskilde, og kraft til å skape noko positivt saman.
For meg og Stad Sp vil det bli viktig å bidra til å byggje eit sterkt fellesskap i Stad kommune. Vi er framleis ein ung kommune som nettopp har kome ut av startgropa etter samanslåinga. Det å byggje ein felles identitet vert viktig framover også, og dette må syne igjen i praktisk politikk der vi prioriterer å skape ei god samfunnsutvikling i alle delar av kommunen. Til det trengs det at kommunen har økonomisk handlingsrom, slik at vi kan skape ei positiv utvikling saman.
I framhaldet av det må eg seie at eg er uroa over den økonomiske situasjonen og dei kraftige kutta som vart vedtekne i pleie og omsorg og i grunnskulen før jul. Stad Kommune har over tid auka lånegjelda kraftig, og no er det ikkje lenger nok pengar til å betale renter og avdrag. Eg meiner det har vore for lite debatt om kva dei langsiktige konsekvensane for kommunen vert dersom lånegjelda berre fortset å auke. Det at vi har nok lærarar i klasseromma, nok varme hender og kloke hovud som tek seg av dei eldre, er den mest grunnleggande oppgåva til kommunen. Eg meiner at utviklinga i Stad kommune har gått i feil retning når det er tilbodet til dei unge og dei eldre som skal vere salderingsposten for stadig nye låneopptak.
Vi må kanskje tenkje slik som vi gjer når vi har bygd oss nytt bustadhus: Det kan vere lurt å få att pusten før ein går på nye investeringar, slik at ein slepp å stramme livreima meir enn ein allereie har gjort.
Stad Senterparti jobbar no med å lage nytt kommunevalprogram for neste periode. Vi har invitert innbyggarane til å kome med innspel, og vi har fått ein god del innspel allereie. Eg trur kommunen kan få til mykje positivt saman med innbyggarane sjølv om vi har ein veldig stram økonomi. Eg vil jobbe for at Stad kommune skal vere ein raus, varm og inkluderande kommune, med stor takhøgde for å seie meininga di. Det handlar om å sjå korleis folk har det i sin kvardag, i ulike livssituasjonar, både i medgang og motgang. Det er ikkje tida for å kome med kostbare vallovnader, men eg lovar å ta kampen for lokalsamfunnet vårt kvar dag.