At Måløybrua stenger når vindkasta overstig ein viss verdi er ein realitet. Vi skal ikkje diskutere denne grensa her, det er ein heilt annan debatt. Tysdag opplevde vi at vêrvarselet for onsdag viste at det var fare for at Måløybrua ville vere stengt i lengre periodar.

Kvifor blir det då ikkje tatt ei avgjersle av skuleeigarar om heimeskule eller andre ordningar dagen før eit slikt varsla uvêr?

Fjordenes Tidende kontakta både Kinn kommune og Vestland fylkeskommune tysdag med spørsmål om kva tiltak dei ville sette i verk sidan det var varsla sterk vind over ein lengre periode komande dag. Kva ville kommune og fylkeskommune gjere dersom elevar til og frå skule vart isolert på den eine eller andre sida av Måløybrua?

Svara Fjordenes Tidende fekk frå Kinn kommune og Vestland fylkeskommune var at drifta skulle gå som normalt, og at ein ville ta ei ny vurdering neste dag.

Det vart då ei lang natt, der både barn, unge og vaksne var usikre på kva morgondagen ville bringe.

I all hast tidleg onsdag morgon bestemte Kinn kommune å halde skular stengt. Seinare på dagen vart elevane ved Måløy vidaregåande skule sendt heim. Dette burde blitt bestemt dagen før ut frå dei vêrmeldingane som låg føre.

Dette handlar om å vere føre var. Det handlar om å ta ansvar og kunne ta ei avgjersle.

Vêr og vind rår vi ikkje over, men med ei vêrmelding som uttrykker fare for at brua vil halde stengt i lengre periodar må ein handle tidleg.

Definisjonen på beredskap er etablerte system for å handtere uønskte ulukker og hendingar.

Ei uønskt hending er at elevar sit «brufaste», og ikkje kjem seg heim frå skulen. Båt kan vere eit alternativ, men det er ikkje alle som er like komfortable med å gå om bord i ein båt når det bles orkan.

Vi har god trening med både heimeskule og heimekontor frå koronapandemien. Med å ta ei samla avgjersle om heimekontor og heimeskule dagen før orkanen, kan ein unngå at born og vaksne står på kvar si side av ei bru og blir urolege for kvarandre.