Rått parti

Det har fleire gonger blitt hevda at Kinn kommunestyre ikkje kan klandrast for at Vågsøy kommunestyre i si tid overkøyrde fleirtalet av innbyggjarane i Vågsøy etter ei folkerøysting om Kinn kommune.

Kva er Kinn kommunestyre sjølv i ferd med å gjere seg skuldig i?

Kommunestyrerepresentant frå Høgre, Arlene Vågene sa i valsendinga til lokalavisene at spørsmålet om framtida til Kinn kommune er ei stor avgjerd, mykje større enn eit ordførarval.

Eg er hjartans einig med henne i dette.

Dersom majoriteten i Vågsøy for tredje gong blir overkøyrd etter å ha sagt meininga si om Kinn kommune i ei folkerøysting eller ei innbyggjarhøyring i kommunens regi vil dette mangle sidestykke i norsk politisk historie.

Kommunestyrerepresentantane er folkevalde for heile kommunen, det er sant. Men dei har eit særskilt ansvar for å ta omsyn til den svakare part. Og denne gongen er det fleirtalet av innbyggjarane i Vågsøy som har røysta i folkerøystinga som er den svakare part, veslebror.

Ja, «ei stemme er ei stemme», det har vi høyrd eit utal gongar. Men om så var hadde både det norske storting og norsk politikk vore snudd fullstendig på hovudet. Ei røyst i Sogn og Fjordane valkrins tel vesentleg meir enn ei røyst i Oslo valkrins. Kvar representant frå Sogn og Fjordane har langt færre røyster i ryggen enn ein frå Oslo, ja faktisk færre enn frå dei aller fleste valkrinsane i heile Noreg fordi valsystemet er bygd opp for å ivareta veslebrørne av dei nasjonale valkrinsane.

I Kinn-samanheng er det Vågsøy som er veslebror med 4176 røysteføre samanlikna med storebror Flora sine 9149.

Rått parti, med andre ord.

Kjære kommunestyrerepresentant.

Arlene Vågene har heilt rett i at dette er ei stor avgjerd. Ei avgjerd som vil prege kystane våre i fleire tiår framover. Og ei avgjerd som også kjem til å bli hugsa i fleire tiår framover.

Eg ber deg leggje prestisje og eigen personlege overtyding om Kinn kommune til sides. Eg ber deg høyre på majoriteten i Vågsøy og ikkje la dei bli overkøyrde endå ein gong.

Denne gongen er dette ditt ansvar.

Du lét det skje på di vakt.

Veslebror blir mutters åleine overmanna av fleire gutar.

Rått parti, med andre ord.

Hjelp veslebror.

Hjelp Vågsøy.

Røyst for deling av Kinn.