Bergenfest, Utkantfestivalen og Måkeskrik er berre nokre av festivalane som musikar Julie Falkevik Tungevåg spelar på i sommar, som ein del av bandet til Erlend Ropstad.
– Det blir kjempefett! Erlend er ein fantastisk fyr, og det er dødsfin musikk. Det blir som å dra på ferie på festival, eigentleg, seier Julie Falkevik Tungevåg.
På turné med Maggio
– Han var jo Spellemanns-nominert for plata si i januar, og då var vi på ein klubbturné rundt om i Norge, seier Falkevik Tungevåg, som gler seg til sommaren:
– Det er jo kule festivalar. Og så blir det eksta kjekt med Utkantfestivalen, der har eg aldri vore. Og så er det jo på Vestlandet, seier ho.
Musikaren har base i Oslo, og i tillegg til å spele i bandet til Erlend Ropstad, har ho også mellom anna sin eigen trio - Falkevik.
– Vi slepp plate sjølve i oktober, på plateselskapet Drabant. Og så skal vi på turné i Norge og Tyskland i november. Då køyrer vi bubil til Tyskland, fortel ho.
Drabant Music er plateselskapet som mellom anna representerer Gåte, Raga Rockers, deLillos, Oslo Ess og Frøder.
– Musikken er ein stad mellom indiejazz og pop. Det starta eigentleg som ein jazztrio då eg studerte i Kristiansand, og så blei det meir vokal og synth. No er det piano, bass og trommer. Eg spelar piano, synth og syng, fortel Fallkevik Tungevåg, som gler seg stort.