Tungevaag & Raaban står så klare for å runde det heile av etter DDE, og Martin Tungevaag fortel at publikum mellom anna kan vente seg ein heilt ny låt.
– Dette blir første gong vi spelar den, så det blir ei premiere for publikum på festivalen, forklarar han på telefon frå Japan.
Duoen har fullt program kvar helg gjennom sommaren, og Strandfestivalen blir éin av tre konsertar i Norge i sommar.
– Det er utruleg kjekt å endeleg få spele i nærområdet igjen. Eg føler jo at eg er heime, fortel Martin Tungevaag som opphavleg kjem frå Stad.
Sjølv om han spelar på store scener verda over, set han stor pris på å stå på mindre scener.
– Dette er nesten slik som med mat. Ein må ha litt forskjellig for å ikkje bli lei, ler han.
I tillegg til å servere ein fersk låt skal dei spele eigne hits, og dei får også selskap av Andrea Santiago på ein av låtane. Dei spelar òg på ungdomskonserten som blir arrangert på dagtid laurdag.
– Eg synest det er litt dumt at ikkje alle skal få høyre oss når vi først er der, så derfor takka vi ja med ein gong vi vart spurde om konserten på dagtid, forklarar, han og legg til at han håpar folk tek turen.
Sjølv landar han i Ålesund fredag og reiser rett på strandfestival laurdag, etter å ha vore innom både Shanghai, Beijing og Tokyo.
– Musikken er begynt å slå gjennom i Asia, så det er utruleg kjekt, slår han fast.