Ordføraren var imponert

– Eg må nesten klype meg sjølv i armen over dette korpset

– Eg må nesten klype meg sjølv i armen over at sju menn frå Torskangerpoll for 100 år sidan starta eit korps som no leverer eit show ein omtrent berre kan sjå på TV, rosar ordførar Ola Teigen etter Torskangerpoll Musikklag sin jubileumskonsert.

Fest: Det var fullt hus i Nordfjordhallen då Torskangerpoll Musikklag sparka i gong jubileumsåret 2020. Musikklaget skal også markere med ei festhelg i juni og ein kyrkjekonsert. Her syng solistane Isak Søraa og Gro Haugen Delilah til akkompagnement fra korps og publikum.   Foto: Svanhild Breidalen

Kultur

– Torskangerpoll musikklag er meir enn berre eit korps, dei leverte eit show ein omtrent berre kan sjå på TV, seier ein begeistra ordførar Ola Teigen (Ap) til Fjordenes Tidende etter konserten.

Eit korps i storform og gode solistar gjorde dette til ein triveleg kveld for Teigen, som meiner det er ein bragd å klare å nå hundre år som korps.

– Ja, det er nesten vanskeleg å tru at det går an. Sju karar i ei bittelita bygd starta dette for 100 år sidan – og dei held på enno. Det må vere noko med samhaldet og måten dei har gjort dette på som har vore til glede både for deltakarar og for publikum.

– Er du korpsentusiast sjølv?

– Eg veit ikkje heilt om eg kan kalle meg det, men eg har spelt to år i korps på kornett.

– Fekk du lyst å begynne igjen?

– Eg prøvde faktisk for eit par år sidan. Men eg trur eg måtte ha jobba hardt for å få opp «embouchuren» min. Kornettistar må trene opp ansiktsmuskulatur og lepper til å bli skarpe, spisse og dei må kunne blåse på ein spesiell måte. Det var ikkje noko for slappe politikarlepper, eg trur det ville tatt lang tid, ler Teigen.

Med sine 100 år er Torskangerpoll Musikklag no det tredje eldste korpset i Kinn etter Florø Hornmusikk (1889) og Måløy Musikklag (1904).

Ein konsert av høgdepunkt

How Great Thou Art song solist Gro Haugen under den kombinerte nyttårs- og jubileumskonserten, og det kan verke som både publikum og gratulantar følte det same for korpset og solistar. For publikum reiste seg fleire gonger, mellom anna for nemnde nummer. Og korpset fekk også ståande applaus då det heile var over. Konserten var sett saman av høgdepunkt frå karrieren, men også nokre nye nummer.

Isak Søraa stilte som solist, og song Delilah saman med Haugen, og My Way og Mack the Knife åleine. Korpset stilte også med eigne solistar. Terje Våge spelte ein nydeleg kornettsolo på Share my Yoke og gleda også med bass-stemma si på glansnummeret Hello Dolly.

Også Lina Wåge og dirigent Lisbeth Våge hadde instrumentalsoloar, medan Erling Wåge song Stormy Weathers i tillegg til å akkompagnere Laila Berg på piano då ho song Fordi eg elskar deg.

Også dei som kom for å gratulere fekk ei musikalsk oppleving som sette spor.

– Steik, så flinke de er til å spele! Eg er så imponert, sa leiar i Måløy Musikklag Kjell Gunnar Tennebø, då han overrekte jubileumsgåva til det 16 år yngre musikklaget. Også Ytre Nordjord Brass, Holvik Skulekorps og Norges Musikkorps Forbund stilte med gratulasjonar og gåver.

Gratulasjonar: Korpsleiar Johan Wåge tok imot gåva frå Måløy Musikklag som var blant fleire gratulantar.  Foto: Svanhild Breidalen

Ei bragd å bli 100

Etter konserten var dirigent Lisbeth Våge oppstemt.

– Eg er kjempeglad og kjempestolt, alt klaffa i dag og salen var stappfull. Kan ein be om meir? Eg må få lov å takke både korps og publikum!

Ho har inga oppskrift på korleis eit korps blir 100 år, men ho trur det har noko med at ein har det kjekt i lag å gjere. Og ikkje minst at det er lystprega.

– Det sosiale aspektet ved korpset er minst halve opplevinga. Og så har vi også funne ein musikkstil som vi likar å spele. Vi ser også at publikum likar det, og når vi får den responsen frå publikum, er det klart at vi også synest det er gøy, seier ho og legg til:

– Og den største bragda er jo at vi har med oss ein i korpset som er over 85 år. Han er framleis med så ofte han berre kan, og storgledar seg over å få vere med. Eg er sikkert på at det held folk friske lenger.

Våge trekk også fram mangeårig dirigent Arne Torskangerpoll som eit lim og ei drivkraft for korpset.

– Han dirigerte korpset i 56 år, og uansett kor mange eller få dei var, så tilpassa han etter tal musikantar han hadde å jobbe med. Han la alltid til rette for at musikken skulle høyrest bra ut. Så han har mykje av æra for at korpset heldt saman gjennom alle dei åra han dirigerte.

Inviterer til festhelg og kyrkekonsert

Det blir også fleire arrangement med Torskangerpoll Musikklag i jubileumsåret.

– Vi skal ha eit arrangement i juni som har meir historisk preg, som handlar om korleis oppstarten var, fortel dirigent Lisbeth Våge.

Dette kjem til å skje på Gravdal skule som var første øvingslokale for dei sju som starta korpset i 1920.

– Vi får jo ikkje plass til så mange inne på skulen, så her blir det fleire framsyningar der ein får oppleve dei tablåa og historiene vi skal presentere der ute.

Ifølge dirigenten er det også planar om ein kyrkjekonsert i jubileumsåret. Denne gongen ønskjer ho seg oppmøte.

– Førre gong vi hadde kyrkjekonsert kom det ganske så få. No ønsker eg meg full kyrkje, for vi har masse flott kyrkjemusikk som vi ønskjer å vise fram!

Den store bildeserien frå jubileumskonserten kan du sjå her.