I denne spesielle framsyninga lovast ei oppleving som sit lenge i kroppen

Tysdag 3. november kan du oppleve ei heilt spesiell framsyning i Operahuset Nordfjord, med mellom andre koreograf og dansar Solveig Styve Holte frå Folkestad. 

Tysdag 3. november kan du oppleve ei heilt spesiell framsyning i Operahuset Nordfjord, med mellom andre koreograf og dansar Solveig Styve Holte frå Folkestad.   Foto: Tale Hendnes

Kultur

Framsyninga «Flakkande røynd» jobbar tverrfagleg med dans, musikk og mote. Publikum sit på scena rundt utøvarane, og det er eit svært avgrensa antal billettar for sal.

Rannei Grenne og Solveig Styve Holte står for dansen, koreografien og konseptet.

– Ein kan møte opplevinga slik ein går ein tur i skogen; å sjå og ta inn utan forventningar om å forstå, men heller forsøke å vere til stades, fortel dei.

Tysdag 3. november kan du oppleve ei heilt spesiell framsyning i Operahuset Nordfjord. På bildet Rannei Grenne.   Foto: Tale Hendnes

Framsyninga strekkjer seg ikkje etter perfeksjon. Alt får vere synleg, og detaljar, saumar og sprekker er opne. Naturen er til stades i både det ein ser og høyrer, publikum sit på og i eit landskap av stubbar, fuglekvitter og djupe bassrytmar kombinert med live framføring av tuba og preparert piano.

Dansen er fjellstø og flakkande, det rigide og formale møter det mjuke og organiske og kan minne om is som frys, er i bevegelse og smeltar.

Designarane Ida Falck Øien og Harald Lunde Helgesen i «HAiKw/» står for kostyma og scenografien i framsyninga, medan musikken er komponert av Anja Lauvdal og Heida Karine Johannesdottir.

Resultatet er ei liveoppleving som sit i kroppen lenge. «Flakkande røynd» varer i knapt ein time. Rett etterpå blir det samtale med og mellom Rannei Grenne og Solveig Styve Holte.

Framsyninga er ein del av turnénettverket Dansenett Norge, og er støtta av Norsk Kulturråd, DansiT, FFUK, Trondheim kommune og Dansearena Nord, Weld.