Erlend kom sist av kameratane i motbakkeløpet – no må han la skjegget gro som straff
Arbeidskameratane bestemte seg i februar for å gjere Veten oppløpet til ein intern konkurranse i bedriftsgruppa si. Straffa for den som tapte var sterkt knytt til ansiktshår.
Straffa var nemleg at dei tre i kollegagjengen frå bedriftene Sea Technology, Måløy verft, Baug Boats og EasyForm med skjegg måtte barbere seg ved tap, medan dei to som ikkje har skjegg måtte la skjegget vekse i tre månadar.
Og om ein av dei av ein eller annan grunn ikkje kunne stille til start vanka det også straff.
– Konkurransen skulle kjennast
– Det betydde at Kristian Lundebrekke, Vebjørn Oftedal og eg måtte ha tatt skjegget om vi tapte, og Kim Ole Rønning og idrettstalentet Erlend Kvalheim måtte anlegge skjegg om ein av dei tapte, forklarer Christan Carlson.
Dei ønskte å delta i Rosa sløyfe-løpet sidan det er ei god sak, men dei var einige om at konkurransen og straffa skulle kjennast. Derfor la dei også inn to styrkeøvingar på VPC inn i konkurransen i perioden før løpet. Dei hadde ein avansert reknemodell for korleis resultatet deira i desse øvingane spelte inn på startutgangspunktet deira i Veten oppløpet. Blant anna gav prestasjonane deira i desse øvingane dei frådrag i tid, eitt kilo per sekund.
– Trass i at eg er gamal og full av betennelsar må eg berre få seie at eg slakta unggutane i desse øvingane, og eg hadde ein stor fordel då vi stod på startstreken, ler Carlson.
Visste kven som kom til å vinne og tape
Alle hadde ein forventing om vinnarar og taparar.
– Alle forventa at Vebjørn Oftedal med sine sterke lår skulle kome på siste plass. Men det viser seg at i motsetning til oss andre, så har han smugtrena i lang, lang tid for å ikkje komme på siste plass. Han kom på andre plass! seier Carlson.
Kim Ole Rønning hadde også lagt inn doble økter trening i det siste – ifølge Carlson – og han kom på førsteplass.
– Han tok rett og slett Vebjørn i ein kjent Northug-spurt dei siste 25 meterane før mål. Det var ei fantastisk bragd.
– Eg var heilt knust og ferdig på toppen, seier han og legg til:
– Men den store skuffelsen i kollegagjengen var at idrettstalentet Erlend Kvalheim, som har slått alle i uthald tidlegare, kom på sisteplass. Han kom også på sisteplass i styrkeøvingane, og måtte gå slukøyra ned Veten, seier Carlson muntert.
Erlend Kvalheim blir då nøydd å la skjegget gro i tre månadar.
– Litt bekymra for kva folk vil tru
Kvalheim på si side verka ikkje så lei seg for sjølve tapet. Han var mest bekymra for kva folk vil tru om han.
– Det er jo så mange av kollegaene mine som allereie har skjegg. Når eg no må la skjegget gro nokre månadar, vil alle berre tru at eg hermar etter dei, smiler han.
Men han blir ikkje aleine om det.
– Sidan Lundebrekke fann ut at han tilfeldigvis skulle reise på ferie, slik at han ikkje kunne stille i konkurransen, må også ta si straff og barbere seg, ler Carlson.
Carlson meiner eit slikt velgjerdsløp er ei god anledning til å møtast og ha det sosialt etterpå.
– Eg oppfordrar bedrifter om å stille opp neste år og ha det kjekt på sin måte!
Kvart år er Brystkreftforeininga på plass under Rosa sløyfe-aksjonen. Laurdag var Solbjørg Iversen og lokallagsleiar i Brystkreftforeinga i Nordfjord, Berit Janikke Melheim, på plass.
– Det er så kjekt å sjå alle som stiller opp kvart år, seier Iversen.
– Vi oppmodar alle damer om å sjekke seg. I fjor var det 4.000 nye tilfelle med brystkreft og mammografiundersøkingane var gått rett ned. Folk møter ikkje opp, seier Melheim og understrekar kor viktig det er å oppdage eventuelle kreftsvulstar tidleg.