– Ragnar er tvers gjennom veldig snill. Det er aldri eit nei, og han stiller alltid opp, seier Wenche Rørvik i Frelsesarmeen i Måløy.

Wenche Rørvik vil gjerne at Ragnar Furnes skal få ei julestjerne fordi han er ein utruleg snill og arbeidsam mann som stiller opp som frivillig for fleire organisasjonar.

– Tvers gjennom snill

– Korleis vil du beskrive Ragnar?

– Ragnar er ein lun, varm, humoristisk og hjartegod person. Han er tvers gjennom veldig snill, seier Wenche Rørvik, og legg til at ho vart veldig glad då ho fekk vite at Ragnar Furnes får ei julestjerne frå Fjordenes Tidende.

– Ragnar fortener verkeleg ei julestjerne for all den frivillige innsatsen han legg ned for å glede andre.

Wenche Rørvik påpeikar at det ikkje berre er Frelsesarmeen som dreg nytte av Ragnar og trekkspelet, og framhevar at Ragnar også underheld mellom låtane med god humor og artige historier der han er.

– Han stiller også opp for familien, driv på i vedskogen og forsyner mange med ved no i vinterkulda.

Sprek og glad

Då Fjordenes Tidende ringer til Ragnar Furnes, forstår vi at vi snakkar med ein aktiv, sprek og raus pensjonist.

– Det var overraskande. Det må no vere mange andre som fortener ei julestjerne meir enn meg. Men veldig kjekt, så tusen takk, seier Ragnar Furnes.

Ragnar seier at han ser på seg sjølv som veldig heldig som har ei god helse og er sprek, og då er det kjekt å bruke av tida si på andre.

– Det blir fortalt at du er ein ivrig mosjonist langs landevegen?

– Eg likar godt å springe. Ja, eg må vel snart betale vegavgift, ler den blide 71-åringen.

Ragnar seier at det ikkje er sjølvsagt at ein kan ha god helse når ein er pensjonist.

– Når eg spelar rundt på eldretuna og sjukeheimane ser eg alle menneska som ikkje får utfalde seg, men berre sit der og tek imot. Eg er takknemleg for at eg er sprek, og då vil eg bruke av tida mi på andre, seier Ragnar Furnes.

Har spelt trekkspel i 62 år

Ragnar fekk sitt første trekkspel av foreldra sine då han var ti år.

– Eg hadde det trekkspelet til eg var 14 år. Då spanderte dei på meg eit trekkspel i full storleik. Det trekkspelet hadde eg heilt fram til 2000-talet.

Nokre år seinare brukte Ragnar morsarven til eit nytt trekkspel.

I romjula skal Ragnar og det nye trekkspelet saman med Frelsesarmeen rundt på fleire juletrefestar, og det gler han seg til.