Ottar er naboen til Trine og familien hennar, og han vil gjerne at dei skal vite kor mykje han set pris på dei.

For livet til Ottar endra seg i sommar, og det blei tøffe dagar.

– Då fekk eg oppleve kor godt og viktig det er med gode naboar som er der i ei vanskeleg og tung tid.

Det at naboar stiller opp slik som dei har gjort, utan å vere i familie eller slekt, synest han er heilt fantastisk.

– Heile familien er heilt utrulege. Trine har verkeleg gjort ting som har betydd mykje, seier han, og fortel at det handlar om enkle ting i kvardagen som har hatt stor betydning for han.

– Takknemlegheita mi til Trine, Tommy, Tina og Troy vil ikkje vere kortvarig. Den vil vare evig, seier han.

– Eit ekte menneske

– Åååå, Ottar, seier Trine då Fjordenes Tidenende ringer for å fortelje at ho får ei julestjerne veslejulaftan blant anna på grunn av det fine ho har gjort for naboen sin.

Og så blir det heilt stille.

– Eg blei heilt sett ut, seier ho, og legg til:

– Eg føler jo at det eg har gjort ikkje er så mykje, men det er veldig godt å tenke på at kvardagslege ting har betydning, seier ho.

Det er fleire enn Ottar som ser kva Trine gjer og kva ho betyr for andre. Marianne Pleym Refvik er venninne med Trine, og fortel at det eigentleg er vanskeleg å beskrive henne.

– Ho er eit ekte menneske, seier Marianne og legg til:

– Ho er ein god samtalepartnar, og får meg alltid til å flire og grine.

Trine er der når Marianne treng henne – og ho er der utan at Marianne treng det. Ho kan finne på å glede Marianne med spesielle videohelsingar eller -samtaler.

– Ho er ei fantastisk god dame, med hjarterom for både små og store. Hadde alle menneske vore som henne hadde det ikkje vore krig, berre kjærleik, omsorg og gode rammer for alle. Eg set stor pris på Trine, og er veldig glad i henne. Og eg er veldig glad for at eg får vere ein del av livet hennar, seier ho.

Det er også ein ting til som Trine har lært Marianne. Det er å vere stolt av seg sjølv.

– Trine er rett og slett unik! smiler Marianne.