– Neste sommar får vi besøk av Stage Dolls, smiler festivalsjef Kent Rune Bugjerde.
– Det er jo eit band som dei som vaks opp på 80- og 90-talet kjenner godt. Dei er eit fantastisk godt festivalband, som skapar liv og røre frå første stund, legg Bugjerde til, og trekk fram hits som Love Don’t Bother Me, Wings of Steel og Soldier’s Gun.
Stage Dolls er eit av åtte band og artistar som skal stå på scena i Refvik 7. og 8. juli neste år. Og Bugjerde lovar at det blir litt for ein kvar smak.
– Målet med bookinga vår er å treffe alle aldersgrupper, og eg er heilt sikker på at vi har treft utruleg godt i år. Vi gler oss enormt til å avsløre neste års artistar.
Han legg til at det også neste år blir Strandfestivalen for dei minste.
– Det blir Strandfestivalen junior laurdagen. Tidlegare har det vore ein kjempesuksess med fullt hus, så det vil vi kome med meir informasjon om seinare. Vi ser at barn og ungdomen kosar seg veldig på arrangementet, og det gir oss som arrangørar mykje, seier Bugjerde.
Trur det blir rift om billettane
Salet av såkalla early bird-billettar starta 12. desember, og før festivalen hadde avslørt ein einaste artist var nesten alle billettane rivne vekk.
Totalt legg Strandfestivalen ut 2.500 billettar, og Bugjerde trur det blir rift om billettane.
– Dei som vil sikre seg plass må vere tidleg ute.
Denne gjengen varma opp til konsertar på campen
Sjølv om festivalarrangørane sikker kunne selt fleire billettar er ikkje dette noko dei ønskjer.
– Målet vårt er at vi heile tida skal utvikle oss gjennom å forbetre gjennomføringa og logistikken. Strandfestivalen skal vere ein feel good-festival der alle skal kose seg og ha ei god oppleving. 2.500 publikummarar er det vi er rigga for, seier Bugjerde.
Men det er ikkje berre publikum som skal kose seg. Festivalen legg også mykje krefter i få artistane til å like seg. Og det har dei lukkast med.
– Vi merkar at artistane vil til Refvik. Vi har hatt store namn som DDE, CC Cowboys og Smokie her, og dei er fantastiske ambassadørar for oss. Dei fortel andre kor bra og kjekt det var i Refvik. Vi gjer det same for artistane som vi gjer for publikum. Kjem du til Refvik, så skal du ha ei fin oppleving.
Vennegjengen i full fart på festival – og dansarane fekk publikum til å skinne
Treng mange hender
For at alle, både publikum og artistar, skal kose seg trengst det mange frivillige. Strandfestivalen treng 100 frivillige både fredag og laurdag både som ordensvakter, backstage, i kiosk, til bongsal og til parkering.
– Vi har nokre flinke folk som har vore med mange gangar som leier dei ulike dugnadsteama våre. Vi kunne ikkje arrangert festival utan dei frivillige, seier Bugjerde.
Dei frivillige var også svært viktige i år då festivalen måtte avlyse programmet fredagen under festivalen grunna vêret.
– Hadde det blitt avlysing begge dagane, så hadde det vore slutten for Strandfestivalen. Det er klart at vi tapte pengar på å måtte avlyse, men ein fantastisk festivaldag laurdag og gode samarbeidspartnarar berga festivalen, seier Bugjerde.
Måtte avlyse eine dagen – kan få konsekvensar for neste år
Han legg til at festivalen er non-proft, og at overskotet blir brukt for å vidareutvikle festivalen. Det gjer at der stod pengar på bok som gjer at arrangørane kan lage festival også i 2023.
– Så no er det berre å glede seg, smiler Bugjerde.