Det var Fjugstad Christiansen sjølv som hadde nominert gjengen ho er ein del av, nemleg akuttberedskapen og legevakta i Nordfjord. Det var derfor ein lykkeleg sjukepleiar som fekk beskjeden om at dei var blitt valt ut.

– Nei å så kjekt!, var den umiddelbare responsen.

– Eg synest alle som jobbar og står på der fortener ei julestjerne. Det er ein positiv, fin og hjelpsam gjeng som gjer det til ein trygg og god plass å jobbe, seier ho.

Shahoz Shwana, Eline Langeland og Astrid Solhaug var på jobb då Fjordenes Tidende tok turen. Foto: Bjørn Erik Drabløs

Fjugstad Christiansen var sjølv på skule i Førde veka overrekkinga skulle skje. Saman la vi derfor ein plan på korleis vi kunne lure kollegaene som var på jobb på Nordfjordeid.

– Eg har ikkje tenkt over korleis dei kan kome til å reagere. Eg håper no at dei blir glade! Dei har i alle fall fortent det, seier ho.

Fjordenes Tidende møtte opp med både journalist og redaktør, Håvar Fagerli for å overrekke julestjerna medan Merethe fekk vere vitne til det heile via videosamtale.

Merethe fekk vere med på overrekkinga via video. Nede i høgre hjørne kan du skimte Eline og Astrid som fekk seg ei stor overrasking. Foto: Skjermdump

Eit givande arbeid

Det interkommunale samarbeidet består av kommunane Stad, Stryn og det som tidlegare heitte Vågsøy. Etter at legekontora i dei ulike kommunane stenger på dagtid, byter dei ulike legane på å ha vakt på legevakta på Nordfjordeid.

– Det er godt å vite for dei som bur i dei ulike kommunane at dei har ein plass å ringe til om dei blir sjuke, seier Merethe.

Sjølv er ho sjukepleiar, og det er nok ikkje å overdrive å seie at ho stortrivst i jobben.

– Dei er verdas beste arbeidskollegaer. Vi har det så gøy i lag og det er ein fantastisk arbeidsplass. I tillegg er det eit veldig givande arbeid, seier ho.