Wåge er nemleg ein av fleire lesarar som meiner at Carmen og Isabell Farstad fortener å bli sette pris på med ei julestjerne.
– Eg har tre barn og alle tre bruker briller. Vi har vore faste kundar hos Carmen og Isabell og dei flotte foreldra deira i ti år, seier ho.
Ho meiner det er trygt og godt å vite at vi har så omsorgsfulle, varme og kompetente folk i vårt nærmiljø.
– Jobben dei gjer med å passe på at ungane våre ser godt er heilt formidabel. Dei tar i mot oss med eit smil når vi kjem inn i butikken, tar i mot og reparerer øydelagde briller og fiksar nye når det er nødvendig.
Wåge meiner dei er fantastiske.
– Det er alltid topp service og det dei leverer er meir enn ein jobb, seier Wåge.
Wåge er ikkje åleine om å rose dei to søstrene. Det er fleire kundar som har tatt kontakt med Fjordenes Tidende for å seie at nettopp desse to damene fortener ei julestjerne.
Ord som går igjen om Isabell og Carmen er omtenksame, hjelpsame, smilande og støttande.
– Dei strekker seg veldig langt, seier ein far som har to barn som bruker briller og som treng regelmessig hjelp frå søstrene.
– Blir heilt rørt
– Dette var veldig koseleg å høyre. Eg blir heilt rørt, seier Carmen då ho får vite at ho og søstra får julestjerne av Fjordenes Tidende.
– Tusen takk. Dette set vi så stor pris på. Vi prøver å gjere så godt vi kan, seier Isabell.
Neste år blir det forandringar i familiebedrifta. Då tar søstrene over butikken.
– Då skal vi fornye oss. Vi kjem til å opprette eit nytt firma. Vi skal avvikle ur, gull og sølv og satse fullt på briller og opptikk, seier Carmen.
– Vi kan ikkje røpe alt, men vi gler oss veldig til forandringane som kjem, seier dei omtrent i kor.