– Dei er så flinke til å engasjere dei som bur der. Ikkje berre lager dei det hyggeleg rundt dei, men dei lager også til mange aktivitetar, som bingo og song, seier Linda Helen, som blir kjempeglad då ho høyrer at dei tilsette på Klokkartunet er ein av dei som får julestjerne av Fjordenes Tidende.
Linda og mannen Jan Inge har som pårørande fått oppleve kva denne omsorga betry i praksis.
– Svigermor har blomstra veldig etter at ho flytta inn på Klokkartunet. Ho er meir sosial og har det betre, seier Linda Helen.
– Dei gjer ein kjempejobb
Ho meiner dei tilsette gjer ein kjempejobb med å få folk til å komme innom og besøke bebuarane, og at det gjer at trivselen også blir betre for dei som bur der.
I tillegg er dei flinke til å skape gode rammer rundt måltida.
– Dei får god mat som dei kan ete saman og kose seg med. Det er faktisk noko av det som betyr mest, og måltida er noko av det dei som bur der ser fram til i kvardagen.
Linda Helen skryt også av kor flinke dei er til å sjå bebuarane og komme inn og helse på.
– Dei kjem innom ofte og seier hei, og pratar med dei og høyrer om dei har det bra. Er det noko dei treng hjelp, til stiller dei opp med ein gong. Dei er heilt eineståande, seier ho.
– Så kjekt å bli sett pris på
Siv Holmøy, som er tilsett i heimesjukepleien i Davik, synest det er veldig kjekt å bli sett pris på.
– Vi er åtte som jobbar enten i heimesjukepleien og i heimehjelpa ved omsorgsbustadane og trygdebustadane. Heimesjukepleien har base her, og har brukarar som vi server både på Klokkartunet og ute i distrikta. Og så har vi heimehjelper som vaskar leilegheiter, er praktisk bistad og lager til middag og kaffimåltidet. Vi prøver å ha fokus på å ha det godt og triveleg. Så det er veldig, veldig kjekt at det blir sett pris på, seier Holmøy då Fjordenes Tidende ringer.
– Det varmar å få slike tilbakemeldingar, smiler ho.