Jazztrombonisten Andreas Rotevatn hadde rundt 50 spelejobbar berre før påske i år.

Du kan høyre Andreas sine klokkeklare trombonetonar i eit bredt spekter av musikalske prosjekt her til lands. Frå bergensbandet Razikas smittsomme indierock, via electronicaprosjektet b0ka til ein av våre eldste musikkinstitusjonar i Norge, Ytre Suløens Jassensemble.

25-åringen frå Nordfjordeid er midt inne i sitt travlaste år så langt i musikerkarriera.

Studenten Andreas

Ein sprengt kalender til tross, så er Andreas student.

– Eg tek ein master innanfor Utøvende musikkteknologi ved Norges Musikk- høgskole, seier musikaren som fyrst gjekk Toneheim folkehøgskole og deretter musikkutdanninga på jazzlinja på Griegakademiet.

Men det har ikkje vore mykje tid til skule så langt i 2015.

– Eg har vore der eit par dagar i år, smiler trombonisten og deltidsstudenten.

Tradisjonell jazz

Han har spelt med mange og har mange timar med utdanning bak seg, men å kome til Ytre Suløens Jassensemble har vore ei utdanning i seg sjølv.

Bandet spelar tradisjonell jazz, inspirert frå New Orleans der jazzen blei født.

– Det er som å ha teke ein bachelor ein gong til. Det er utfordrande musikk på eit veldig proft nivå. Eg har lært mykje av å være i Suløen sidan starten av 2013, seier han.

Han skal være med å formidle mange uttrykk, frå rock til jazzens krybbe.

– Det er også det som er kjekt. Eg hadde gått lei om eg skulle drive med det samme heile tida, seier han.

Han likar å leike seg litt, og likar friheita i eksempelvis jazzen.

– Det skal være rom for å kome med sitt. Hvis det blir for rigid, så trivast eg ikkje så godt, medgir 25-åringen.

Electronica frå Eid

Eit av prosjekta bærer namnet b0ka, og består av folk frå Nordfjordeid.

– Vi har gitt ut ein EP som er å streame på eksempelvis Spotify. Vi har spelt på Malakoff, Sommarlutt og på Veir sitt arrangement Straum.

I tillegg til å spele har Andreas også elevar frå 8-12 år. Og han kjenner seg sjølv litt igjen i dei unge håpefulle.

– Det er fleire av dei som byrjar å brenne skikkelig for musikken. Mi oppgåve er å sende dei rett veg, seier eidaren, som forlengst har funne sin veg i livet.