Vi overraska begge ved å ringe for å få høyre kva det var ved den andre personen som gjorde at dei fekk lyst til å nominere dei i Fjordenes Tidende sin Nokon å glede-julekalender.
Ottar Nygård meiner Margun har ei enorm stå-på-vilje.
– Ho er heilt unik i å stå på for å få ting gjort. Som leiar i Bryggja pensjonistlag har ho vore veldig opptatt av å gjere ein innsats for dei ukrainske flyktningane vi har på Flatraket. I tillegg er ho med i alt mogleg anna. Ho har vore samfunnsengasjert i alle åra eg har kjent ho, seier Nygård.
Det var etter at han gjekk til avisa og foreslo at Stad kommune kunne bruke eldretunet på Flatraket til å huse flyktningar at Margun tok kontakt med han.
– Vi i bygda ville stille opp for dei som kom, og det ville ho vere med på. Dei har kjøpt inn gåver og laga gåver, og vore med på fleire treff. Berre det at dei brenn slik for ei anna bygd enn si eiga er utruleg flott. Margun – og heile pensjonistlaget – har eit hjarte av gull, seier han.
Første avsløring
– Men du. Vi har ei lita overrasking til deg. Margun Ervik har nominert deg til julestjerne av same grunn. Så det må du sjølvsagt få.
– Kva er det du seier? Det var verkeleg overraskande. Eg har verken tenkt eller reflektert over at eg skulle bli nominert til det. Eg er berre genuint opptatt av at vi må gjere det beste ut av den tida ukrainarane har her i Norge, seier Nygård, som er oppriktig overraska.
Kjøpte fiskestong til flyktningane
Etter praten med Ottar, var det Margun sin tur til å få ei lita overrasking.
– Kva er det med Ottar som gjer at du meiner han burde få ei julestjerne?
– Han gjer ein fantastisk jobb for flyktningane som bur på Flatraket. Eg hugsar då ein av dei kom, eg trur det var ein mann i sekstiåra. Han var så glad for å kome til ein plass utan bråk og smell rundt seg, og at han hadde kome til ein plass like ved havet. Då reiste Ottar til Måløy for å kjøpe fiskestong til han og ungane, noko som vi i pensjonistlaget var med på å betale for, seier ho.
Det er Ottar og kona Grethe Bryggja pensjonistlag har brukt som kontaktpersonar i arbeidet sitt for flyktningar på Flatraket.
Andre avsløring
– Vil du høyre noko artig? Vi har nettopp prata med Ottar Nygård, for han har nemleg nominert deg til julestjerne for arbeid du og pensjonistlaget har gjort med flyktningar. Så det er ikkje berre han som får ei julestjerne.
– Nei no … er det tull? Dette var rett og slett rørande å høyre, utbryt Margun.
Ho fortel at pensjonistlaget heile tida har tenkt at pengane dei har i pensjonistlaget bør gå til andre som treng dei, i staden for at dei reiser på turar og liknande.
– For tenk om det hadde vore oss, at det var vi som måtte flykte. Då hadde vi ønskt at det var nokon som stod klar til å ta imot oss også.