Dei eldste ungane i Trollskogen barnehage i Vågsøy har i to månader arbeidd med førstehjelp og brannvern. Tysdag vart prosjektet avslutta med omvising på brannstasjonen.
– Det har blitt nokre aha-opplevingar i heimane til barna. Det er mange som har enda opp med å kjøpe seg nytt varslings- og sløkkeutstyr, fortel førskulelærar i Trollskogen barnehage, Lene Reed.
Lærer å varsle
Kvar dag har ein av barna i barnehagen fått med seg brannbamsen Bjørnis heim. Med bamsen har det følgt ei sjekkliste der barna, saman med familien, skal gå gjennom sløkke- og varslingsutstyr, kva ein skal gjere om det brenn og branntryggleik i heimane.
Slik skal brannvesenet nå ut til de minste
På spørsmål om kva ein skal gjere om det brenn, har barna svaret klart.
– Vi må ringe 110.
– Og så rope at det brenn.
– Så må vi gå ut.
– Og møtast på møteplassen, seier barna.
– De kan mykje meir enn veldig mange vaksne, rosar John-Inge Henden i Vågsøy brann og redning.
Får sjekka heimane
Brannvesenet i Vågsøy samarbeider med barnehagane om prosjektet, og er godt nøgde med resultatet så langt.
Åtvarar mot desse vedomnane
Brannbamsen Bjørnis har vore ein viktig del av prosjektet. Bamsen er først og fremst utvikla for å møte barn som har behov for omsorg og tryggleik ved ulukker og traume. Men han bidreg også med å vekke barn si interesse for førebyggande brannvernarbeid.
På slutten av omvisinga på brannstasjonen fekk barna tildelt ein eigen Bjørnis-diplom som viser at dei har teke del i prosjektet.