– Vi har aldri tidlegare vore i nærleiken av eit slik resultat. Vi har vore oppe i 70–80 millionar, men resultatet for 2016 er ei dobling av våre beste resultat. Det skuldast i hovudsak auka kvantum og gode prisar på råvarene, seier dagleg leiar Stig Ervik i Ervik Havfiske Holding AS.

Dagleg leiar Stig Ervik i Ervik Havfiske Holding opnar tilbygget til administrasjonsbygget på Otneimneset samstundes som han legg fram eit årsresultat før skatt for 2016 på 161 millionar. Ervik Havfiske er omtalt som verdas største linereiarlag.

I selskapsstrukturen med 31 selskap er det eitt som skil seg ut – Frøyanes AS med tre båtar som driv linefiske mellom anna etter tannfisk i Sørishavet. Dette selskapet stod for om lag 60 av dei 161 millionane i overskot holdingselskapet kunne bokføre i fjor. Med unntak av eit par små selskap er det overskot over heile lina. Verftet Westmek i Borgundvåg gjekk mellom anna 3,9 millionar i pluss, og Joker-butikken på Refsnes hadde 230.000 i overskot.

30-årsjubileum

Resultatet er vesentleg betre enn venta, budsjettet for holdingselskapet var 58 millionar kroner.

– Vi hadde større kvantum og betre pris enn venta. Prisen på torsk, lange og brosme har vore høg, og held seg framleis.

Nybygga: Dei to nybygga i Tyrkia er i rute. Dette er den største enkeltinvesteringa i Ervik Havfiske nokon sinne. Samla pris er 340 millionar kroner.

I år er det 30 år sidan Ervik Havfiske vart etablert av Stig Ervik og tremenningen Kjell Magne Ervik. Dei to kameratane eig framleis 50 prosent kvar. Stig Ervik er tydeleg på at dei vil ha lokalt eigarskap og at selskapet skal vere ei positiv kraft i lokalsamfunnet.

Forretningsformelen har vore stadige nysatsingar og vidare vekst. Det er toppsjefen tydeleg på skal halde fram.

– Den dagen du sluttar å utvikle deg, er du ferdig.

Moderne: Nybygget er bygd i glas og aluminium, og har ei bru til den gamle delen.

Pengane dei sit igjen med etter 2016 er allereie plassert. Ikkje i banken, men i til saman tre nye båtar, i eige administrasjonsbygg, i produksjonshall hjå Westmek og i hotell på Leikanger i samband med utbygging av Furebuda.

Dei to nybygga i Frøyanes-flåten er under bygging i Tyrkia. Her går arbeidet etter planen og dei skal vere ferdig i februar. Då går dei rett til Sørishavet for fiske etter tannfisk.

– Kvart av nybygga kostar 170 millionar kroner. Vi lånar om lag 100 millionar kroner på kvar båt. Det vil seie at vi stiller cirka 140 millionar kroner i eigenkapital, forklarer Stig Ervik.

Han trekkjer også fram båten Vestliner som ein del av satsinga som følgje av gode tider.

– Dette var ein båt vi tok over som nybygg i Russland i fjor.

Opnar nybygg til 13 mill.

Ervik Havfiske opnar ein ny del i administrasjonsbygget i helga.

Ifølgje dagleg leiar Stig Ervik er prisen for nybygget 10,5 millionar kroner ekskl. meirverdiavgift, totalt 13 millionar.

Lokal satsing: Stig Ervik har ein klar filosofi om å byggje omgjevnadene rundt seg. Dragebygg har entreprisen på nybygget til 13 millionar kroner.

Verksemda hadde ei tilstelling i samband med havfiskefestivalen i Måløy laurdag, etterpå tok dei inviterte gjester med seg i båt til administrasjonsbygget på Otneimneset der det var opning av dei til saman 220 nye kvadratmetrane fordelt på to etasjar.

Som i den eldre delen har nybygget store glasflater, slik at ein har ei storslått utsikt mot Stadhavet og omgjevnadene elles frå alle kontora. Samla areal er no over 500 kvadratmeter. Det er Stadlandet-verksemda Dragebygg som har ansvaret for bygginga.

Ervik Havfiske har også engasjert seg i Furebuda, eit tidlegare restaurantprosjekt som har vist seg vanskeleg å få til å gå. No blir det satsa, og Leikanger er i ferd med å få hotell.

– I første byggetrinn satsar vi 12 millionar på Furebuda. Det er artig å sjå at vi får til ting, seier Stig Ervik.

Den nye produksjonshallen for fabrikkutstyr til fiskeflåten hjå Westmek har ein kostnad på 10 millionar kroner.