– Dette blir ein god start etter ein lang sommarferie

Fredag og laurdag er det klart for TINE Fotballskule på Stadlandet Stadion. 40 barn er påmelde, men det er plass til fleire.

Fredag og laurdag blir TINE fotballskule arrangert på Stadlandet stadion. – Vi har gode påmeldingar, og ein kan framleis melde seg på, seier Margareth Leivdal, leiar i Stadlandet idrettslag. Foto: privat

– Det blir to dagar med fotballaktivitetar for barn mellom 6 og 13 år, fortel Margareth Leivdal, som er leiar i Stadlandet Idrettslag.

I tillegg til fotballaktivitetar dagen lang både fredag og laurdag, så blir det tacobuffet.

– Det brukar å vere veldig populært, seier Leivdal, og legg til at prisane blir familievenlege så flest mogleg kan delta.

Ho fortel vidare at barna som blir med i år får ei ekstra overrasking.

– Nike har jubileum og vi er trekt ut på landsbasis slik at barna får ein ekstra overraskingspakke med premiar.

Torsdag var det 40 påmelde til fotballskulen, men Leivdal seier at ein framleis kan melde seg på.

– Vi ser på dette som ein fin moglegheit til å samle ungane igjen før skulestart. Dette blir ein god start etter ein lang sommarferie, før skulen tek til, seier Leivdal.